Premyer Liqanın iddialı komandalarından olan “Zirə” ardıcıl ikinci oyunda qələbə üzünə həsrət qaldı.
10-cu turda “Turan Tovuz”a məğlub olan “qartallar” bu dəfə “Sabah” önündə məğlubiyyətdən son saniyələrdə vurulan qolla qurtuldu.
Zirəlilərin müdafiəçisi Ange Mutsinzi Sportinfo.az-a verdiyi açıqlamada 1:1 hesabı ilə başa çatan oyun barədə danışıb:
“Əlbəttə, qələbə qazanmaq yaxşı olardı. Ancaq bu cür gərgin qarşılaşmada 1 xalı da qənaətbəxş hesab edirəm.
Sevindirici məqam komanda olaraq sona qədər döyüşməyimiz və bərabərlik qolunu vurmağımız idi. Çempionatda asan oyun yoxdur.
Gördüyünüz kimi, bütün rəqiblər xüsusi istəklə mübarizə aparır. Ona görə də bu cür nəticələrə görə təəccüblənməmıliyik”.
Yayda avrokubok matçlarında özünü yaxşı tərəfdən “Zirə” Premyer Liqada keçirdiyi 10 oyunda 3 məğlubiyyətlə üzləşib ki, bu, ilk “5-lik”də yer alan komandalar arasında ən pis göstəricidir.
Ruanda millisinin də şərəfini qoruyan Mutsinzi ona ünvanladığımız “niyə bu qədər yenilgi sayı var” sualına cavab tapa bilmədi:
“Futbolda bu cür hallar qaçılmazdır. Ancaq dediyiniz məsələylə bağlı konkret səbəb göstərə bilməyəcəyəm”.
10 turdan sonra aktivində 16 xal olan “Zirə” turnir cədvəlində “Sabah”la birlikdə 4-5-ci pillələri bölüşür.
HƏBİB
