Yenidən avrokuboklara vəsiqə qazanmaq iddiasında olan “Zirə” heyətinə yeni futbolçu cəlb edib.

Qəsəbə təmsilçisi Yusuf Lavalı heyətinə qatıb.

Nigeriyalı vingerlə 2+1 illik müqavilə bağlanılıb.

"Zirə" bu yay Fuad Bayramov, Aydın Bayramov, Elçin Əlicanov, Davit Volkov, Junior Martins, Ange Mutsinzi və Georgi Papunaşvilini də transfer edib.

26 yaşlı afrikalı 2020-ci ilin yayında 3 il oynadığı “Lokeren”dən (Belçika) “Neftçi”yə azad agent kimi keçib. Burada 7000 dollar əməkhaqqı alıb.

2023-cü ilin yanvarında isə “Arouka”ya yollanıb. Portuqaliya klubu bu transferin qarşılığında bakılılara 25 min dollar təzminat ödəyib.

Laval həmin vaxt seçiminin səbəbini bu cür açıqlamışdı:

“Daha böyük uğurlar qazanmaq üçün bu addımı atdım. “Aruka”nı seçdim, çünki azarkeşlərlə çox sıx əlaqəyə malik gözəl klubdur.

Komandanın mümkün olan ən yüksək uğuru qazanmasına kömək etmək istəyirəm. Əlimdən gələni edəcəm və yaxşı nəticələr üçün mübarizə aparacam.

Burada böyük uğurlar qazanmağı hədəfləyirəm. “Aruka”nın heyətində parlaq çıxış edəcəyimə inanıram”.

Hər şey portuqaliyalıların “Obaqol” ləqəbi ilə çağırdığı Lavalın gözlədiyi kimi olmadı. Yeni ölkədə 26 matçda cəmi 293 dəqiqə meydanda olan afrikalı bundan narazı qaldı.

Odur ki, “Arouka” rəhbərliyinə müraciət edərək, 2 illik müqaviləyə qarşılıqlı razılıq əsasında xitam verdi.

“Zirə“ isə indi onun üçün yeni çağırışdır. Burada əsas heyətə düşməyə, həmçinin qazanacağı pula layiq oldığını sübuta yetitrməlidir.

Nigeriyalı müqaviləyə imza atmaqla, “qartallar“ın ən ödənişli futbolçularından biri olub. Sabiq “Neftçi“li yeni klubunda12-14 min dollar civarında əməkhaqı alacaq.

SPORTİNFO.AZ