Həftəsonu Premyer Liqada 29-cu tura start veriləcək.
Sportinfo.az xəbər verir ki, turun mərkəzi oyunu aprelin 6-da “Qarabağ”la “Zirə” arasında keçiriləcək.
Turnir cədvəlinin ilk iki pilləsində qərarlaşan komandaların dueli təkcə mövqe deyil, statistika baxımından da böyük önəm kəsb edir.
Məsələ burasındadır ki, “Zirə” hazırda turnir cədvəlində “Qarabağ”a ən yaxın komanda olsa da, şəxsi matçlarda ağdamlılar önündə aciz görünür.
Təsadüfi deyil ki, 2015-ci ildən bəri çempionat çərçivəsində baş tutan 38 qarşılaşmanın cəmi 2-də qəsəbə təmsilçisi qələbə qazanmağı bacarıb.
Qurban Qurbanovun yetirmələrinin 25 qalibiyyəti fonunda 11 matçda bərabərlik qeydə alınıb. “Zirə” üçün yeganə ümidverici məqam qələlərdən birinin son duelə təsadüf etməsidir.
Digər tərəfdən bu rəqiblərin son matçları bol qollu alınır. Axırıncı 3 oyunda 4 və ya daha çox qol vurulub. “Qarabağ” son 6 görüşün hamısında qol vurmağı bacarıb.
Aprelin 6-da Tofiq Bəhramov adına Respublika Stadionunda keçiriləcək “Qarabağ” – “Zirə” oyunu saat 19:30-da başlayacaq.
.jpg)
