«Zirə»nin builki hədəfi dəyişməyib.

Yenə Avropaya getmək istəyirlər.

Hər məşqçi bu məqsədə çatmağı bir yolda görür.

Rəşad Sadıqov ümumi gedişatı 1 cümləylə ifadə edib: «Məsuliyyətli olmaq lazımdır, bu, 3-4 il əvvəlki çempionat deyil».

«Zirə» mövsümün ilk yarısında tamaşaçını da düşünərək, meydana çıxırdı. İndi vəziyyət bir qədər fərqlidir: turnir cədvəlində sıxlaşma yaranıb, hərə öz dərdini çəkmək məcburiyyətində qalıb.

Qütbləşmə əmələ gəlib - medallar və liqada qalmaq uğrunda yarışanlar.

Şamaxı istər «Qarabağ» olsun, istər başqaları - bütün komandaların çəkinə-çəkinə getdiyi yerdir. Bu səfərdə hər şey mümkündür.

Hamı «Şamaxı»dan çəkinir, eləcə də, «Zirə». Ehtiyatlı oynayıb, qələbə qazana bilmək də futbol ilahəsinin bir lütfdür.

Ruan Renato oyunun həm qəhrəmanı, həm də antiqəhramanı oldu. Fasiləyə saniyələr qalmış başla gözəl qol uvrdu, hesabı bərabərləşdirdi.

Final fitindən sonra isə Aydın Bayramovun üzərinə yeridi. Bu, tamamilə yersiz, artıq hərəkət idi.

Paltardəyişmə otağında komanda yoldaşıyla öpüş-görüş edə, barışa bilər.

Bu, maksimum 25-30 nəfərin qarşısında olan «sülh anlaşmasıdır». Amma o hadisə hamının gözü qabağında baş vermişdi və Renato nə boyda yanlış hərəkət etdiyini anlaşmalıdır.

Bütün hallarda günahkar odur, hikkəsini, eiosiyasını komanda yoldaşından üstün tutmağa haqqı çatmır.

Şübhəsiz, Rəşad Sadıqov cəza kəsəcək ona. Bəlkə də artıq kəsib.

MUSA