Premyer Liqanın 19-cu turunun mərkəzi qarşılaşması Zirədə baş tutacaq.

Medallar uğrunda mübarizə aparan meydan sahibləri əsas rəqiblərindən olan “Araz-Naxçıvan”ı qəbul edəcək.

İndiki məqamda zirəlilər üçün əsas məqsəd turnir cədvəlində 9 xal geri qaldığı rəqibi ilə xal fərqini azaltmaq və 3-cü pilləni “Turan Tovuz”ın əlindən almaqdır.

Digər prinsipial məqam isə çempionatın ilk yarısında naxçıvanlılarla zirəlilər arasında gerçəkləşmiş iki dueldə Rəşad Sadıqovun çalışdırdığı kollektivin qələbə qazana bilməməsidir.

Biri heç-heçə başa çatıb (1:1), digərində “Araz-Naxçıvan” 1:0 hesablı qələbəyə sevinib.

Əsas heyətdə görməyə alışdığımız Aydın Bayramov Sportinfo.az-a qarşıdakı oyunla bağlı danışıb.

Azərbaycan millisinə də cəlb olunan qapıçı qələbə istəklərini gizlətməyib:

“Əslində, heç-heçə başa çatan oyunda qalib gəlməliydik. Çünki matçboyu üstün tərəf biz idik. Şanssızlıq nəticəsində vacib 2 xal itirmişdik.

Fasilədən sonra ilk oyundur. Yaxşı hazırlıq keçdik, yoldaşlıq oyunlarında meydana çıxdıq. Deyərdim ki, komandadakı hazırkı vəziyyət və əhval-ruhiyyə yaxşıdır.

Görüşün əhəmiyyətini bilirik. Çox ağır oyun olacaq. Meydana yalnız və yalnız qələbə üçün çıxacağıq.

Mümkün qalibiyyət bizi “Araz-Naxçıvan”a daha da yaxınlaşdıracaq. İstəyimizə çatacağımıza ümid edirəm”.

Yanvarın 18-də Zirə İdman Kompleksinin meydanında baş tutacaq oyunun start fiti saat 16:00-da çalınacaq.

HƏBİB