Hər bir məşqçinin öz profili var.
Bu, kiminə görə, sistemdir, kiminə görə, modeldir.
Kağız üzərində hər məşqçidir. O, ağlındakı taktikanın uduşlu olmasını fikirləşirsə, buna görə onun üstünə getməyə dəyməz.
Baxış baxışdır, əsas icraçıdır. Yəni ki, futbolçular.
İcraçılar ayrı-ayrılıqda və komanda halında həmin tapşırıqları necə yerinə yetirəcək, hə, bütün sualların cavabı buradadır.
«Zirə» son turlara kimi icraçıların üzündən çox əziyyət çəkdi, çox xal itirdi. Kinoda deyir e, 8000 pul vermişəm, oynamaqlarına bax!
Çağdaş futbolun anası sürətdir. Futbolçu tez hərəkət etmir və tez düşünmürsə, ona «əppək» çatmayacaq.
Davit Volkovu axırıncı dəfə nə vaxt belə istəkli görən olmuşdu? Gürcüstanlı hücumçu qəflət yuxusuna getmişdi sanki. Ayıldı və dönüşünü 3 qolla «yudu».
Deyəsən, hansısa şəxsi problemləri yaranıb və bu, onun oyununa mənfi çalarlar qatır. Evdəki ab-havaya uyğun gah çox pis təsir bağışlayır, gah əla.
Salifi Suma da bu cəhətdən, elə bil, Davit Volkovun kiçik qardaşıdır, ondan geri qalmır.
Bu cütlük günündə olsa, dağı dağ üstünə qoyarlar, qarşılarına çıxan tapılmaz. Bəla də burasındadır ki, stabillikləri çatışmır.
ELNUR
