Turun mərkəzi qarşılaşması Mərdəkanda baş tutacaq.
Ötən mövsümü gümüş medallarla baş vuraraq avrokuboklarda inamlı təsir bağışlayan “Zirə” “Liv Bona Dea Arena”da builki çempionatın sürpriz kollektivi “Araz-Naxçıvan”ın qonağı olacaq.
10 tur keçməsinə baxmayaraq, naxçıvanlılarla zirəlilər 1 oyun az keçirib. Və hazırda birincilər qəsəbıə təmsilçisini 4 xal qabaqlayır. Üstəlik, bu komandalar noyabrda təxirə salınmış şəxsi görüşdə üz-üzə gələcəklər.
Bu, o deməkdir ki, “Zirə”nin mümkün məğlubiyyəti “qartallar”ı “3-lük”dən geri salacaq. Qələbə qazanacağı təqdirdə isə xal fərqi azalacaq.
Komandanın əsas heyət üzvlərindən olan Ange Mutsinzi Sportinfo.az-a məlum qarşılaşma ilə bağlı açıqlama verib:
“Hər iki komandanın futbolçuları üçün çətin oyun olacaq. “Araz-Naxçıvan” kifayət qədər güclü rəqibdir. Arxada qalan həftələrdə nəyə qadir olduqlarını göstəriblər. Təhlükəli futbolçuları var.
Plana uyğun olaraq oyuna hazırlaşırıq. Məqsədimiz qələbə qazanmaqdır. İstəyimizə çatmaq üçün əlimizdən gələnin ən yaxşısını edəcəyik”.
Oktyabrın 26-da keçiriləcək oyun saat 16:00-da başlayacaq.
HƏBİB
