“Zirə”nin futbolçusu Abbas İbrahim Sportinfo.az-a müsahibə verib.

26 yaşlı nigeriyalı yarımmüdafiəçi Sportinfo.az-a komandasının Konfrans Liqasının pley-off mərhələsi çərçivəsində “Omoniya” üzərində qazanılan qələbə ilə bağlı sualları cavablandırıb.

- 1:0 hesablı qələbədən sonra əhval-ruhiyyən yerindədir?

- İlk oyundakı ağır məğlubiyyətdən sonra qalib gəlmək istəyirdik. Əlhəmdüllilah, istəyimizə çatdıq. Əziyyət çəkərək meydanı qalib tərk etdik. Avrokubok mövsümü bizim üçün başa çatdı. Bundan sonra daxili yarışlara köklənəcəyik.

- Bu qələbəyə görə sevinirsən, yoxsa 0:6-nın üzüntüsü imkan vermir?

- O yenilgidən sonra əsas istəyimiz nəyə qadir olduğumuzu göstərmək idi. Şükürlər olsun ki, istəyimizi həyata keçirməyi bacardıq. Buna görə sevinməyə dəyər.

- Yeri gəlmişkən, Nikosiyada komandaya nə olmuşdu?

- Futbolda belə hallar qaçılmazdır. Bir gün düşərli olur, digəri xoşagəlməz. O gün bizim gün deyildi.

- Azarkeşlər cari mövsümdə “Zirə”dən nə gözləyə bilər?

- Ötən mövsüm olduğu kimi, yenə ən yaxşısını etmək üçün çalışacağıq. Məqsədimiz bizə uğur gətirən yerlərdən birini tutub yenidən avrokuboklara qatılmaqdır. Fikrimcə, bunun üçün yaxşı heyətimiz və imkanımız var.

- Çempionluq?

- Həyatda hər şey mümkündür. Ötən mövsüm yeni başlayanda bəlkə də heç kim ikinci yeri tutacağımızı və Konfrans Liqasının pley-offunda oynayacağımızı düşünmürdü.

HƏBİB