“Zirə” – “Osiyek” görüşündə iş başında olacaq hakimlərin adına aydınlıq gəlib.

Oyunu Avstriyadan olan hakimlər briqadası idarə edəcək.

Meydanda yaşananlara Yulian Veynberger nəzarət edəcək. Yan xətlərdə ona Maksimilian Kolbitş və Andreas Vitşniqq kömək edəcəklər.

Dördüncü hakim funksiyasını Stefan Ebner yerinə yetirəcək.

39 yaşlı referini futbol hakimi ilə yanaşı, həm də polisdir. Onun adı azərbaycanlı futbol həvəskarlarına tanışdır.

Belə ki, indiyə qədər avrokuboklarda 4 dəfə təmsilçilərimizin oyunlarında iş başında olub.

2018-ci ildə Çempionlar Liqasında “Qarabağ”ın “Şerif”lə səfər matçında dördüncü hakim funksiyasını daşıyıb. Bizimkilər həmin qarşılaşmanı məğlub başa vurub – 0:1.

2021-ci ildəki növbəti təyinatı da “Qarabağ”ın adı ilə bağlı olub. Bu dəfə Konfrans Liqasında “Aberdin”lə dueldə, yenə dördüncü hakim kimi və yenə səfər oyununda. “Köhlən atlar” şotlandları 2:1 hesabı ilə məğlub edib.

Həmin ilin noyabrında isə Bakıya səfər edib. DÇ-2022-nin seçmə mərhələsi çərçivəsində Azərbaycan yığması BOS-da Lüksemburqla qarşılaşanda, o, yenə “dördüncü” olub. Millimiz rəqibinə 1:3 hesabı ilə uduzub.

2023-cü il, Konfrans Liqası, təmsilçimizin adı “Neftçi” və bu dəfə yenə səfər qarşılaşması. İstanbulda keçirilən “Beşiktaş” – “Neftçi” görüşündə Yulian komandaları meydana baş hakim kimi çıxarıb. “Ağ-qaralar” türklərə 1:2 hesabı ilə uduzub.

Göründüyü kimi, təcrübəli referi 4 halda Azərbaycan komandalarını yaxından görmək şansı qazansa da, bizimkilər cəmi 1 dəfə qələbəyə sevinib, 3 halda məğlub olub. Vaynberger ilk dəfə “Dalğa Arena”ya ayaq basacaq, ilk dəfə “Zirə”nin oyununu idarə edəcək.

Ümid edək ki, ayağı bu dəfə Azərbaycan komandası üçün düşərli olacaq.

“Zirə”ylə “Osiyek” arasında səfərdə baş tutan ilk duel 1:1 hesabı ilə sonuçlanıb.

Avqustun 15-də keçiriləcək cavab qarşılaşması saat 20:00-da başlayacaq.

HƏBİB / SPORTİNFO.AZ