“Zirə” Moldova səfərində baxımlı, qol epizodları ilə zəngin futbol göstərib uduzsaydı, futbol ictimaiyyəti komandanı “baltalayacaqdı”.

Məğlubiyyətə heç cür don geyindirmək olmur. İstəyirsən 50 qol fürsəti yaxala, 100 korner yerinə yetir, xeyri yoxdur. Uduzmağın adı üstündədir.

Avropa Liqasındakı yeganə təmsilçimiz ağıllı oyun və öncədən planlaşdırılmış gedişlər hesabına “Şerif”i doğma azarkeşləri önündə məğlub etməyi bacardı.

Bəli, problemlər yetərincədir. Əsas heyətdə hücum planlı futbolçuların arasında təzə ad yalnız Davit Volkov idi ki, o da vaxtilə bu formanı əynində daşıyıb.

Rüstəm Əhmədzadə, Ceyhun Nuriyev, İsmail İbrahimli, Rafael Utziq – bu oyunçular ötən mövsüm komandanı uğura daşıyanlar olsalar da, nədənsə hücumlar zamanı anlaşma səviyyəsi baxımından axsayırdılar.

Cinah ötürmələri heç bir halda işə yaramırdı, sadə ötürmələr bir çox hallarda ünvana çatmırdı.

Fikir verdinizsə, qolun təşkilində yeni gələnlər iştirak etdi – Junior Martinsin fəallığı Volkovun usta zərbəsi ilə yekunlaşdı.

Müdafiə xətti 1-2 epizodu çıxmaq şərti ilə inamlı göründü. Fuad Bayramovla Məqsəd İsayev varkən, İssa Cibrilanın “11-lik”də yer alması sürpriz ad idi.

Nigerdən olan solaxay Ruan, Stefan və Qismətlə birlikdə müdafiənin etibarlılığını qorumağı bacardı. Tiaqo Silva isə səviyyəsini çoxdan ortaya qoyub. Adam həqiqətən möhtəşəmdir.

“Zirə” praqmatik futbolla avrokubok mövsümünə qələbə ilə başlamaqla digər klublarımıza əla motivasiya verdi, cavab matçı öncəsi böyük üstünlük qazandı və təbii ki, ölkə reytinqinə xallar qazandırdı.

Baxımlı oynayıb heç nə qazanmamaqdansa, darıxdırıcı oynayıb uğurlu nəticə ilə sevindirmək daha ləzzətlidir. Bu, avrokuboklardakı digər təmsilçilərimizə də aiddir.

HƏBİB