«Turan Tovuz»da yeni təyinat gözlənilir. Bu barədə klubdan redaksiyamıza məlumat daxil olub.

Bildirilib ki, Ehtiram Quliyev komandanın idarəçiliyini Səməd Nəsibovdan almaq niyyətindədir.

İki ildən çoxdur idman direktoru postunu tutan funksionerin işi İdarə Heyətinin sədrini qane etmir. Odur ki, Quliyev tələbəlik yoldaşının səlahiyyətlərini başqa birinə tapşırmaq istəyir.

Artıq onun 2-3 nəfərin namizədliyini gözdən keçirdiyi vurğulanır. Onlardan biri də Futbolun İnkişaf Fondunun (FİF) icraçı direktoru Tural Piriyevdir.

Səməd Nəsibov uzun illərdir futbol sektorundadır. Əvvəllər «Qəbələ»nin uğurları üçün çalışıb. Bu sahədə böyük təcrübəyə malikdir. Onun «minus»u klubdaxili bəzi qərarlara səssiz qalmamasıdır.

Məsələ ondadır ki, Nəsibov qışda həyata keçirilən bəzi transferlərə qarşı çıxıb. Təzminat ödənilərək alınan 6 futbolçudan ən azı dördünün gəlişinə etiraz bildirib.

Orxan Əliyev, Rəhim Sadıxov və digərlərinin komandaya fayda verməyəcəyini bildirib. Bu da rəhbərlərin ətrafında dolaşanların xoşuna gəlməyib.

Ehtiram Quliyev öz qohumlarını və digər yaxınlarını «Turan»da yerləşdirib. Hərəsinə bir iş tapşırıb.

Həmin fərdlərdən fərqli olaraq, Səməd Nəsibov peşəkar kadrdır. Sadəcə, şəxslər sözügedən direktorun onlardan üstünlüyünü qəbul edə bilmir və tez-tez sədrin qulağını doldururlar.

Elə bu kimi hallara görədir ki, Səməd bəyin klubda mövqeləri bir müddət əvvəl zəifləməyə başlayıb. Media və marketinq sahələri ondan adınıb.

Hörmətli Quliyev hər iki işi digər yaxın adamı Nəsimi Paşayevə tapşırıb.

SPORTİNFO.AZ