“Turan Tovuz”un zədəliləri ilə bağlı vəziyyət ürəkaçan deyil.
Ötən il sonunda xəsarət alan Şəhriyar Əliyev, Denis Marandiçi və Roderik Millerin çempionatın ikinci yarısında yaşıl meydanlara qayıdacaqları gözlənilirdi.
Lakin sağalma prosesi nəzərdə tutulan proses üzrə getmir.
Denisin durumu heç də yaxşı deyil. Ayağı sındığına görə əməliyyat olunan Moldova millisinin də şərəfini qoruyan müdafiəçi aprelin sonu, mayın əvvəlində yüngül məşqlərə başlayacaq.
Bərpası və kollektiv məşqlərə qoşulması da müəyyən zaman alacaq ki, cari mövsümdə oynamayacağı dəqiqdir.
Martda komanda çalışmalarına başlayaraq ayağında yenidən ağrılan hiss edən Şəhriyara da yenidən “gözlə” tapşırığı verilib. Kapitanın ayın sonunda məşqlərə başlayacağı gözlənilir. O, ən yaxşı halda mayda “Turan”a kömək edə biləcək.
Miller də onun kimi. 33 yaşlı mərkəz müdafiəçisi bu ayın sonlarına yaxın kollektivə qoşulacaq. Fiziki formasını qaydasına salmasının müəyyən zaman alacağını nəzərə alsaq, maydakı oyunlara qədər hazır olacağı gözlənilir.
Şəhriyarla Roderikin 4-5 ay yaşıl meydanlardan uzaq düşndüyünü nəzərə alsaq, qayıdandan sonra Kurban Berdıyevin onlara əsas heyətdə şans verib-verməyəcəyinin özü də böyük sualdır.
HƏBİB / SPORTİNFO.AZ
