«Turan Tovuz»un İdarə Heyətinin sədri Ehtiram Quliyev dövrələrarası edilən transferlərdən çox narazıdır.
Bu barədə iş adamının yaxın çevrəsindən saytımıza bildirilib.
Redaksiyamıza verilən məlumata görə, Quliyev qış fasiləsindən sonra düşərgəyə cəlb olunan oyunçuların komandanı gücləndirmədiyi qənaətindədir.
Qeyd olunub ki, sədr Kurban Berdiyevə sözünü hələ deməyib. Çünki baş məşqçi ilə bu konteksdə söhbət etmək fürsətini gözləyir.
Rusiyalı çalışdırıcı isə özünü o yerə qoymur, mövsümün sonunu «sıxıb».
«Onların gətirilməsi üçün kifayət qədər pul xərclənib. Demək olar hamsının keçmiş klubuna təzminat ödənilib.
Bu transferlər kluba 600 min dollardan baha başa gəlib. Ehtiram müəllim bu qədər pul xərcləməsinə peşmandır.
Dəfələrlə söhbət düşüb, deyib ki, gərək belə eləməzdim, pulum havaya getdi. Çünki nəticələr pisləşib, komanda qışdan sonra əvvəlki kimi oynamır» - Quliyevin yaxın adamları bizə belə deyir.
Qərb klubu bu ilin yanvarından bəri 6 transfer əməliyyatı həyata keçirib: onlardan ikisi yerli, qalanları legionerdir.
Bunlar Anton Kraçkovski, Rəhim Sadıxov, Orxan Əliyev, Kauan Martins De Paula, Joarlem Batista Santos və Hayderson Hurtado Palominodur.
SPORTİNFO.AZ
