“Qarabağ” üç oyundur bizi məğlub edə bilmirdi. Ona görə də bu dəfə fərqli motivasiyada olacaqlarından xəbərdar idik”.

“Turan Tovuz”un futbolçusu Faiq Hacıyev Sportinfo.az-a açıqlamasında “Qarabağ”a məğlubiyyəti şərh edib.

Cümə günü bölgədə keçirilən qarşılaşmada rəqibinə göz açmağa imkan verməyən çempion meydan sahiblərini 4:1 hesabı ilə məğlub etməyi bacardı.

Faiq yenilginin əsas səbəbini buraxılan üçüncü qolla əlaqələndirərək “köhlən atlar”ın qisas hissi ilə alışıb-yandığını gizlətməyib:

“Oyuna çox yaxşı hazırlaşmışdıq. Məşqçilər heyəti “Qarabağ”la bağlı bütün incəlikləri diqqətimizə çatdırmışdı ki, hansı anlarda nə etməliyik.

Qol buraxsaq da, ruhdan düşmədik. Hesabı bərabərləşdirdik, hücumlar qurmağa çalışırdıq. 2:1-ə qədər pis təsir bağışlamırdıq, təhlükə yaradırdıq, qol vurmaq istəyirdik.

Ancaq üçüncü qoldan sonra sanki xal qazanmağa inamımız itdi. Geridönüş etmək bir az çətin görünürdü. “Qarabağ” da bundan istifadə edib fəallığı artıraraq dördüncü topu vurdu.

Məğlub olsaq da, mübarizəni davam etdiririk. Yenilgidən və səhvlərdən dərs çıxarıb, daha yaxşısını etməyə çalışacağıq. Finişə 8 tur qalıb. Maksimum xallar yığmaq üçün əlimizdən gələni edəcəyik”.

28 turdan sonra aktivində 43 xal olan “Turan Tovuz” dördüncü pillədə qərarlaşıb.

Qərb təmsilçisi növbəti görüşünü aprelin 5-də səfərdə “Səbail”ə qarşı keçirəcək.

HƏBİB