Qış fasiləsindən sonra Premyer Liqada uğursuzluq yaşayan «Turan Tovuz»da hamının qaş-qabağı yer süpürür.
Komandanın «qara zolağ»a düşməsi və oradan heç cür çıxa bilməməsi yalnız Kurban Berdiyevi narahat etmir.
Rusiyalı baş məşqçi özünü əvvəlkitək sakit aparır. 73 yaşlı «Baba»dan fərqli olaraq, rəhbərlik gərginlik içindədir.
Bugünlərdə yaşanan olay isə bıçağın sümüyə dirənməsini göstərir. Belə ki, funksionerlər futbolçularla görüşərək, onlara barmaq silkələyib.
Ard-arda gələn pis nəticələrə görə kollektiv üzvlərini sərt tənqid edən rəsmilər onları qəsdən zəif oynamaqda suçlayıb. «Kim istəmirsə, çıxıb gedə bilər, biz heç kimi zorla burada saxlayan deyilik» - belə deyilib.
Klubun İdarə Heyətinin sədri Ehtiram Quliyev hazırda dərin sarsıntı içindədir.
Tovuzlu milyarder İlham Rəhimov Kurban Berdiyevi Azərbaycana gətirəndən sonra o, «Turan»a böyük miqdarda vəsait ayrılıb. Bu rəqəm ötən iki illə qətiyyən müqayisə oluna bilməz.
Fəqət, «Rubin»in sabiq çalışdırıcısı ona yaradılan şəraitin qarşılığını vermir. Bütün bunlar azmış kimi, Berdiyev yönətimi saymır. Heç birini ciddiyə almır. Onlarla komanda arasına «sərhəd» çəkib.
Görünür, rəsmilərin futbolçularla söhbətindən xəbəri yoxdur.
Olsaydı, aləmi bir-birinə vurmuş, bəlkə də paltardəyişmə otağının önündən keçmələrinə də qadağa qoymuşdu.
SPORTİNFO.AZ
