«Turan Tovuz» sıralarına yeni oyunçu qatıb.
Premyer Liqanın ilk iki dövrəsindən sonra turnir cədvəlinin üçüncü pilləsində yer alan qərb təmsilçisi hücum xəttini gücləndirib.
Belə ki, tovuzlular «Kəpəz»dən Orxan Əliyevlə anlaşıb.
Premyer Liqanın cari mövsümündə 7 qol vuran forvard artıq «Turan»ın düşərgəsindədir. O, Kurban Berdiyevin başçılıq etdiyi qafilənin tərkibində Türkiyəyə yollanan qafilədə yer alıb.
Orxan Əliyev Azərbaycan çempionatlarında 30 qol vurub. 29 yaşlı forvard indiyədək 169 matça çıxıb. Əliyev “Sumqayıt”da 14, “Araz-Naxçıvan”da 9, “Kəpəz”də 7 dəfə fərqlənib.
O, oynadığı klublardan “Xəzər Lənkəran”la “Zirə”də qol hesabını açmayıb. Gəncə klubunun üzvü Azərbaycan çempionatları tarixində 30 və daha çox qol vuran 102-ci oyunçudur.
Əliyev bu siyahıda Kamal Quliyev, Valter Quqlemon və Ceyhun Sultanovla 99-102-ci yerləri bölüşdürür. “Kəpəz” hazırda turnir cədvəlində 10 xalla doqquzuncudur.
SPORTİNFO.AZ
.jpg)
