«Turan Tovuz» 2025-ci ilə 4 yeni tranfserlə başlayacaq.
Bu, Kurban Berdiyevin tələbidir.
Baş məşqçi seleksiya planını klub rəhbərliyinə təqdim edib. Rusiyalı çalışdırıcı minimum bu qədər futbolçuya ehtiyac duyduğunu bildirib.
72 yaşlı mütəxəssisin hansı mövqeləri gücləndirmək istəməsi də məlumdur. O, mərkəz hücumçusu, pleymeker, dayaq yarımmüdafiəçisi və cinah müdafiəçisi istəyir.
Berdiyevin fikrincə, mövcud heyətlə medallar uğrunda mübarizəni davam etdirmək mümkün deyil. Ona görə, qış fasiləsində yeni oyunçular düşərgəyə qoşulmasa, komanda tezliklə liderlər qrupundan uzaq düşəcək.
Ehtiram Quliyev, yəqin ki, transfer bazarlığına əlavə büdcə ayıracaq. Ancaq çətin ki, bu, Berdiyevi qane eləsin.
Çalışdırıcı kifayət qədər bahalı legionerlərə göz dikib. Hansı ki, onlardan birinin (hücumçu) qiyməti 1 milyon dollar, digərinin (yarımmüdafiəçi) dəyəri isə 800 min dollardır.
Mahaçqala «Dinamo»sunun sabiq sükançısı iki ayağını bir başmağa dirəyib, İdarə Heyətinin sədrini seçim qarşısında qoyur.
Bəribaşdan xəbərdarlıq edib ki, əgər sərəncamında görmək istədiyi əcnəbi oyunçular alınmasa, «Turan»da qalmayacaq.
SPORTİNFO.AZ
