Premyer Liqanın 11-ci turunun açılış oyununda obrazı dildə desək, nəfəslər kəsildi.

Tovuzda nə oyun idi elə?

Meydan sahibləri qərb derbisində “Kəpəz”i qəbul edirdi və qarşılaşmaya maraq kifayət qədər böyük idi.

Cümə günü, yəni həftəiçi, üstəlik, havanın soyuq olmasına baxmayaraq, mərkəzi tribunalar ənənəvi şəkildə dolmuşdu. Gənc, yaşlı, uşaq, qadın – cinsindən və yaşından asılı olmayaraq hamı Tovuz şəhər stadionunun yolunu tutmuşdu.

90 dəqiqə ərzində baş hakim Rauf Allahverdiyevin nələr çəkdiyini bir Allah bilir, bir də özü. Oyunun tempi və ikili mübarizələr o qədər çox idi ki, baş qaşımağa imkan tapımaq olmurdu.

Hesabı meydan sahibləri açdı, Luis Paçu penalti qolu ilə sabiq komandasını məyus edib “1-lər”i bərabərləşdirdi, hər kəs görüşün bu hesabla başa çatacağını düşündüyü anda Emanuel Hakman dəqiq zərbə ilə “Turan Tovuz”a qələbə qazandırdı – 2:1.

Həmin an tribunalardakı vəziyyəti təsvir etmək üçün söz də acizdir. Təqdim olunan videogörüntülər hansısa mənada köməyə çata bilər, amma tam yox.

Klub rəhbərliyinin VİP-lojadakı hayqırtısını 10 ildən sonra atalıq xoşbəxtliyi yaşayan kişinin sevincinə oxşatmaq olardı. Tribunalardakı mənzərə isə yadıma 2020-ci ilin oktyabr-noyabr aylarını saldı.

Cənab Prezident İlham Əliyev az qala hər gün hansısa kənd, rayon, şəhərin işğaldan azad olunması ilə bağlı anons verəndə, dəlilər kimi sevinirdik ha, bax, Hakmanın qələbə topundan sonra yaşananlar o unudulmaz günləri xatırladırdı.

İşğaldan azad olunmuş torpaqlar demişkən, tovuzlu azarkeşlər bu dəfə də şəhidlərin ruhuna ehtiram nümayiş etdirməklə diqqət çəkdi. Oyundan əvvəl və 44-cü dəqiqədə tribunada şəhidlərin şəkilləri əks olunan plakatların qaldırılması və stadiona toplaşan hər kəsin onları ayaqüstə alqışlaması möhtəşəm görüntülərə səbəb oldu.

Hazırda klavyaturanın düymələrini döyəclədikcə ağlımda sual dolaşır – bu səhnəni niyə Bakıda, yaxud başqa bölgələrdə görmürük?

HƏBİB, Bakı-Tovuz-Bakı

VİDEONU BU LINKƏ DAXİL OLARAQ İZLƏYİN