"TuranTovuz"un hücumçusu Aleks Souza Sportinfo.az-a müsahibə verib.
Braziliyalı legioner ilk olaraq Premyer Liqanın 9-cu turunda "Zirə"ni məğlub etdikləri matç (1:0) barədə danışıb.
- Çətin oyun idi. Amma biz evdə oynayanda hər şey fərqli olur. Çünki inanılmaz azarkeş dəstəyi olur. Bu da çox şeyi dəyişir.
- İkinci yarıda daha inamlı olmağınız nə ilə bağlıydı?
- Baş məşqçi sona kimi birlikdə mübarizə aparmalı olduğumuzu dedi. Çünki "Zirə" güclü komandadır. Çox yaxşı baş məşqçiləri var. Öz məqamımızı gözləməli idik. Biz də bu cür etdik.
- 3 oyundu komanda qələbə qazana bilmir. "Zirə" ilə matçda da uğursuz seriyanın davam etmək ehtimalı sizi qorxutmurdu?
- "Zirə" yaxşı pressinq edən kollektivdir. Amma bu məqamlardan çıxa bildikdən sonra öz oyununu oynamaq rahat olur.
- Qələbədən sonra milli fasiləyə qələbə ilə yollanmaq yerinə düşdü, yoxsa davam etmək daha uyğun olardı?
- Hələki bu barədə tam düşünmürük. Bəzi komanda yoldaşlarım öz milli komandalarına gedəcək. Onlar geri qayıdandan sonra növbəti qarşılaşmalara köklənəcəyik.
- Zədələr stabil oynamasına mane olur. Azarkeşlərin arzuladığı Souzanı nə vaxt görə bilərik?
- Bəli, zədə məni narahat etdi. Oyunuma birbaşa təsir göstərdi. Hər şey vuracağım birinci qoldan asılı olacaq. İnanıram ki, bir qol vura bilsəm, bunun davamı da gələcək.
XANOĞLAN İMANOV
