“Açıq danışaq, “Qarabağ”ı udmaq asan iş deyil, şükürlər olsun ki, buna nail olduq”.
“Turan Tovuz”un kapitanı Şəhriyar Əliyev Sportinfo.az-a açıqlamasında komandasının Premyer Liqanın 4-cü turu çərçivəsində çempion üzərində qazandıqları 1:0 hesablı qələbəni bu cür şərh edib.
Kurban Berdıyevin gəlişindən sonra yeni mərhələyə qədəm qoyaraq çempionatda məğlubiyyət acısı dadmayan bölgə təmsilçisi çətin səfər qarşılaşmasında 3 xala sevindi.
32 yaşlı futbolçu məqsədə çatmağı görə baş məşqçinin tapşırıqlarını düzgün yerinə yetirməkləri ilə əlaqələndirib:
“Baş məşqçi rəqibi tam dəqiqliyi ilə analiz edib bizə öz tapşırıqlarını vermişdi. Məqsədimiz rəqib futbolçulara boş zona verməmək və bacardıqca onlara yaxın oynamaq idi.
Komanda olaraq çox əziyyət çəkdik. Fikrimcə, məhz bu amilin sayəsində istəyimizə çatdıq.
Sıx və mübariz oyunla istədiyimiz qolu vurduq. Əslində, daha bir neçə qol imkanımız var idi. İkinci qolu vursaydıq, işimiz daha rahat olardı".
“Turan Tovuz” 4 turdan sonra topladığı 10 xalla turnir cədvəlinin vahid lideridir.
Qərblilər 5-ci futbol həftəsində öz meydanında “Səbail”i qəbul edəcək.
HƏBİB
.jpg)
