"Turan Tovuz" bu gün Luis Paçu ilə yollarını ayırıb.
Bu barədə Tovuz təmsilçisinin mətbuat xidməti məlumat yayıb.
Braziliyalı hücumçunun müqaviləsinə qarşılıqlı razılıq əsasında xitam verilib.
Forvard 2023-cü ilin yayında "Turan Tovuz"a keçmişdi.
Cənubi amerikalı legionerin qərb klubunu tərk etməsi gözlənilməz oldu. Kurban Berdiyevin ona etimad göstərmədiyi barədə ilk məlumat saytımıza məxsusdur - biz bunu hələ iyunun son günlərində oxucularımızın diqqətinə çatdırmışdıq.
Yeni baş məşqçi ondan niyə üz çevirmişdi? Rusiyalı çalışdırıcı hələ Qəbələ toplanışı zamanı özü üçün dəqiqləşdirmişdi ki, Paçu tətbiq edəcəyi taktiki sxemə uyğun gəlmir.
«Sambaçı»nın müdafiəyə kömək xarakterli tələbə uymaması, hərəkət traektoriyasının azlığı Berdiyevə xoş gəlməmişdi. Odur ki, rəhbərliyə sözügedən hücumçu ilə əlaqəli mənfi raport vermişdi.
«Kəpəz» və «Zirə»nin maraq dairəsində olan forvardın «Turan»la sözləşməsi 2025-ci ilin yayında bitəcəkdi. Tərəflər bir «sağ ol»la yollları ayırmayıb.
Əgər Paçu danışıqlar prosesinin əvvəlində 1 illik maaşının bəribaşdan ödənilməsini tələb edirdisə, axırda yumşalıb. Yönətim 5 ayın məvacibini vermək şərti ilə onu kontraktı pozmağa razı salıb.
SPORTİNFO.AZ
.jpg)
