“Əsas fərq odur ki, bizdə süni örtüklü meydan yoxdur”.

Bu sözləri Sportinfo.az-a açıqlamasında “Sumqayıt”ın hücumçusu Bobur Abdixolikov deyib.

“Kimyaçılar”ın fevralda sıralarına qatdığı özbəkistanlı legioner iki ölkənin çempionatını müqayisə edib:

“Bizdə bütün oyunlar təbii qazonlarda keçirilir. Əvvəl azarkeşlərin sayı elə də çox deyildi.

Lakin son illərdə baxırlar, dəstəkləyirlər. Özbəkistanda da Azərbaycandakı kimi çempionatda ciddi rəqabət var.

Əsas fərq “sintetika” ilə bağlıdır, qalan şeylər oxşardır”.

Abdixolikov hələ 4 il qabaq Azərbaycana gələ bilərmiş. Özbəkistan millisinin hücumçusu 2021-ci ildə Premyer Liqamızın bir neçə klubuna təklif olunub.

Orta asiyalı forvarda aid dosye "Neftçi" və "Keşlə" (indiki "Şamaxı") rəhbərliyinin masası üzərinə qoyulub.

"Keşlə" asiyalı legionerin xidmətindən imtina edib. Çünki menecerlər bu keçidin baş tutması üçün onlardan 160 min dollar istəyib.

"Neftçi" isə qarşı tərəfə nə "hə", nə də "yox" deyib. "Ağ-qaralar" gözləmə mövqeyi tutub.

Səbəbi məlumdur: Samir Abasov bu mövqe üzrə başqa namizədlər düşünüb.

“Kimyaçılar“ 2015-ci ildən yetirməsi olduğu "Nasaf"ın şərəfini qorumuşş ön xətt oyunçusu ilə 1 il uzatmaq şərti ilə mövsümün sonuna qədər sözləşmə imzalayıb.

“9” nömrəli formanı geyinən 27 yaşlı hücumçu artıq Premyer Liqamızda qol hesabını da açıb. O, 27-ci turda “Turan Tovuz”la keçirilən səfər oyununda komandasının qələbə qolunu vurub (2:1).

Bobur Abdixolikov karyerası ərzində yerli “Nasaf”, Ukraynanın “Rux” (Lvov), Belarusun “Energetik” (Minsk) və Qazaxıstanın “Ordabası” klublarının şərəfini qoruyub.

Özbəkistan millisinin üzvü adıçəkilən ölkənin U-19, U-22 və U-23 yığmalarında da çıxış edib.