Adətən, deyirlər ki, qalib heyəti dəyişməzlər.

Deyəsən, bu sözlər hələ də Vaqif Cavadovun qulağına çatmayıb.

Yaxud da ki, bilir, amma kənar təzyiqlərə məruz qaldığı üçün çoxdan sınaqdan çıxmış ənənənin ziddinə gedir.

Onun ixtiyarında Xəyal Fərzullayev kimi gənc var. Yaşı cəmi 20-dir, amma artıq adından söz etdirməyi bacarıb.

Cavandır, perspektivlidir, həvəslidir, «panika»ya düşən deyil. Onun özəlliklərindən biri «çərçivə»də özünü quş kimi hiss etməsidir, topa reaksiyaları əladır. Xüsusən yerlə gələn toplara refleksii göz oxşayır.

Topa çıxışlar üzərində də işləsə, mən sizi əmin edirəm ki, Qurban Qurbanov onu 1-2 ilə, bəlkə də daha tez «Qarabağ»a aparmaq istəyəcək.

Xəyal Fərzullayevə indi yalnız oyun praktikasını artırmaq lazımdır.

Vaqif Cavadovun «Kəpəz»lə ev, «Turan Tovuz»la səfər matçılarında əla təsir bağışlayan gənc qapıçını son turda yenidən ehtiyata atması ədalətsizlikdir.

Düşünürəm ki, o, tərəzi-mizanı düzgün qurmadığı üçün Tanrı tərəfindən cəzalandırıldı, yenə 3 qol buraxdılar.

Mehdi Cənnətovun qapısında gördüyü topları bilmirəm Cavadov kənardan izləyərkən hansı hislər keçirdi.

Buradan ona səslənirəm - cavan oğlansan, məşqçilikdə ilk addımları atırsan, indidən düzgünlük prinsiplərinə həssas yanaş, ona əməl et, onun-bunun dediyinə qulaq asma!

Haqqa girmə, yoxsa gözləmədiyin yerdə və gözləmədiyin anda necəsə cəzalandırılacaqsan!

MUSA