"Sumqayıt" səkkizi Premyer Liqada, ikisi isə Azərbaycan kubokunda olmaqla artıq ardıcıl 10 oyundur rəqib qapısına yol tapa bilmir.
Vaqif Cavadovun yetirmələri sonuncu dəfə ötən il dekabrın 8-də "Neftçi"yə 2:0 hesabı ilə qalib gəldikləri matçda qol vurublar.
"Sumqayıt" hazırda dünya futbolunda bu uğursuz seriyası davam edən klublar arasında öndədir.
Türkiyə 1-ci liqasının autsayderi "Yeni Malatyaspor" 8 oyunluq qolsuzluğunu, nəhayət, dünən "Şanlıurfaspor"la qarşılaşmada dayandıra bilib - 1:4.
Uğursuz oyunları davam edən komandalardan "Velez Sarsfield" Argentina çempionatında yeni mövsümün ilk 7 turunda qol üzünə həsrət qalıb.
Çexiya çempionatında "Pardubitse"nin, Misirdə “İsmaili”nin quru seriyaları isə 5 oyuna çatıb.
Avropanın aparıcı milli çempionatlarına gəlincə, A Seriyasında “Venesiya” və “Leççe”, Premyer Liqada “Lester”, Bundesliqada “Sankt Pauli”, Liqa 1-də də “Reyms” ardıcıl 4 matçdır rəqib qapısına yol tapa bilmirlər.
“Araz-Naxçıvan”ın da ölkə çempionatında qolsuz seriyası 4 oyuna çatıb. Amma bu uğursuzluq müddətində Elmar Baxşıyevin yetirmələri digər yarışda - Azərbaycan kubokunda iki dəfə “Zirə”yə qalib gəliblər – 1:0, 2:0.
Rasim Mövsümzadə
_1.jpg)
.jpg)
