![“İndi özümə gəlmişəm” - Psixoloji travma yaşayan futbolçu](https://www.sportinfo.az/media/2024/08/07/screenshot_20240807_224740_instagram.jpg)
"Sumqayıt"ın müdafiəçisi Murad Xaçayev Premyer Liqanın birinci turunda "Kəpəz"i məğlub etdikləri (2:0) qarşılaşma haqda Sportinfo.az-a danışıb.
- Mövsümə qələbə ilə başladınız. İlk olaraq bu qələbə barədə nələr deyə bilərsən?
- Çempionata inamlı qələbə ilə başladığımız üçün çox şadıq. Oyunun əvvəlindən etibarən təhlükəli anlar yaradırdıq. Oyunumuz yaxşı alındı. Buna görə də layiqli qələbə qazandıq.
- Ağır Macarıstan səfərindən sonra komanda qısa müddətdə toparlanmağı necə bacardı?
- Səfər həqiqətən çox ağır keçdi. Həm psixoloji, həm də fiziki cəhətdən. Komandanın səfər oyunundan qayıtdıqdan iki gün sonra çempionatda oynadığını xatırlamıram. Əsas odur, qələbə qazana bildik.
- "Fehervar"la ilk oyunda aldığın qırmızı vərəqədən sonra danışmaq istəməmişdin. Psixoloji olaraq özünə gələ bilmisənmi?
- Komanda yoldaşlarım və məşqçilər heyəti sayəsində deyə bilərəm ki, bəli.
- Növbəti turda sizi Tovuz səfəri gözləyir. Hansı ümidlə səfərə yollanacaqsınız?
- Onların məşqçilər heyəti dəyişdi və əksər futbolçular dəyişdi. Keçən mövsüm də onlara qarşı bütün oyunlar çətin keçdi, amma bu yeni mövsümdür. Yaxşı nəticə əldə etməyə çalışacağıq.
XANOĞLAN İMANOV