.jpg)
Yeni mövsümə hazırlıqların 2-ci mərhələsini Türkiyənin Ankara şəhərində davam etdirən "Sumqayıt" ikinci yoxlama oyununu keçirib.
Sportinfo.az xəbər verir ki, Samir Abasovun baş məşqçisi olduğu komanda Türkiyə 1-ci liqası təmsilçisi "Gənclərbirliyi" ilə üz-üzə gəlib.
"Sumqayıt" 35-ci dəqiqədə Cordan Rezabalanın matçda vurduğu yeganə qolla 1:0 hesablı qələbə qazanıb.
"Sumqayıt" bundan əvvəl yoxlama görüşündə Rusiyanın Premyer Liqa təmsilçisi "Orenburq"a 1:2 hesabı ilə uduzmuşdu.
"Artıq Qızılcahamamdakı hazırlığımızın demək olar ki, böyük bir hissəsini arxada qoymuşuq. Komanda olaraq əsasən taktiki və texniki məsələlər üzərində işləyirik.
Bununla yanaşı fiziki hazırlıqlarımız da davam edir. Bugünkü yoxlama matçında da üzərində işlədiyimiz bir çox taktiki gedişləri sınaqdan keçirdik".
Bu sözləri "Sumqayıt"ın baş məşqçisi Samir Abasov Türkiyə 1-ci liqası təmsilçisi "Gənclərbirliyi"nə 1:0 hesabı ilə qalib gəldikləri oyundan sonra deyib.
"Keçən oyundan sonra da qeyd etmişdim ki, bu cür qarşılaşmalarda nəticə önəmli deyil. Əsas olan odur ki, artıq oyunçularım onlardan tələb olunanları meydanda göstərməyə başlayıblar.
Amma üzərində işləməli olduğumuz məsələlər var və bunları bilirik, bu yöndə məşqlərə davam edəcəyik" - deyə o bildirib.
