"Bəzən bizdən asılı olmayan səbəblər olur".

Bu sözləri Sportinfo.az-a açıqlamasında "Şamaxı"nın baş məşqçisi Ayxan Abbasov deyib.

Ötən ilin yayından bəri "şirlər"in sükanı arxasında dayanan mütəxəssis "Zirə"də, "Sumqayıt"da və "Turan Tovuz"da əlinizi daşın altına qoyaraq, işə başlamışdız. Sizi həmin daşın üstündə nə vaxt görəcəyik" sualına cavabında maraqlı fikirlər səsləndirib:

"Baş məşqçiyə inanmaq lazımdır. O demək deyil ki, məşqçini dəyişmək olmaz.

Amma bir klub istədiyi məşqçini tapıbsa, davam etməlidir. Yanaşmalar fərqlidir.

Klub idarəetməsi çox önəmlidir. Bəlkə də futbol idarəetməsini bir fabrik, şirkət idarəetməsinə bənzədirlər.

“200-300 işçi işlətmişəmsə, futbolu idarə etməyə nə var?” düşüncəsi ola bilər. Amma futbol elə sahə deyil.

Bir klubu inkişaf etdirməyi çox istərdim. Bünövrəsini qoyduğun kollektivlə yaxşı nəticələr əldə etmək olar.

Bizdə yaxşı nəticə ancaq yer tutmaqdır. Hər şeyə çox qısa müddətdə baxırıq.

Milli komandaya futbolçu verməyi, hansısa legionerin satışından pul qazanmağı və ya gənc futbolçuların üzə çıxarılmasını təhlil etmirik.

"Sumqayıt"da olduğum vaxt bir dövr oldu ki, 9 oyunçumuz milliyə dəvət aldı. Hətta bunu başqa yerə yozanlar da oldu.

Həmin futbolçular bu gün də iddialıdır. Məşqçilər dəyişdi, amma həmin futbolçular yenə var.

Elvin Bədəlovun bu gün ən yaxşı yerli mərkəz müdafiəçiləri sırasında olmasına sevinirəm. Adı "Qarabağ"la çəkilir. Amma biz onu "Sumqayıt"a baxışa çağırmışdıq.

Murad Xaçayevin adını çəkə bilərəm. Bu şeylər də uğurdur.

Bu gün "Turan"ın iddialı olmasında çalışdığımız iki ilin əməyi var. Ora dəvət etdiyimiz legionerlər bu gün digər klubların maraq dairəsindədir.

Milleri komandaya cəlb edəndə kömək etməyəcəyini düşünənlər vardı. Amma bu gün bir çox komanda onu heyətində görmək istəyir.

Bir komandanı qurmaq çətindir. Hamısı vaxt aparır. Bu gün "Şamaxı"da nəticədən çox, üzə çıxan gənclər Azərbaycan futbolunun qazancıdır. Mən belə baxıram".