“Azərbaycan klublarından dəvət gəlsə, danışmaq, müzakirə etmək olar”.
Bu sözləri Sportinfo.az-a açıqlamasında vaxtilə ölkəmizdə legioner həyatı yaşamış Natan Oduva deyib.
2021/22 mövsümünün ikinci yarısını “Keşlə”də, 2022/23 sezonunu “Turan Tovuz”da keçirən ingiltərəli futbolçu hazırda klubsuzdur.
Azərbaycana qayıtmaq variantını inkar etməyən 28 yaşlı vingerə vaxtilə rəhbərliyi altında top qovduğu Ayxan Abbasovun hazırda “Şamaxı”nı çalışdırdığını xatırladıb, bu komandada oynamaq barədə nə düşündüyünü soruşanda, cavabı belə oldu:
“Ayxan Abbasovla münasibətlərimiz yaxşıdır. Onun rəhbərliyi altında “Turan Tovuz”da birlikdə çox yaxşı mövsüm keçirdiyimi xatırlayıram.
Həm insan, həm də məşqçi kimi bəyəndiyim biridir. “Şamaxı” da mənə tanış addır.
Vaxtilə bu klub “Keşlə” adlananda, orada top qovmuşam. Oradakı vəziyyətlə və şəraitlə müəyyən mənada tanışam.
Odur ki, ”Şamaxı”dan təklif alsam belə, müsbət yanaşmaram. Niyə?
Çünki hədəfləri yüksək olan komandada oynamağı arzulayıram. Müdafiə olunan yox, daha çox hücum edən və avrokuboklar uğrunda mübarizə aparan komandanı nəzərdə tuturam”.
Natan ölkəmizdə top qovduğu ilyarım ərzində 43 oyunda forma geyinməklə 6 qol və 6 assistlə yadda qalıb.
HƏBİB
