“Şamaxı”da əla mövsüm keçirən Leroy Mikels qış fasiləsindən sonra karyerasını başqa klubda davam etdirə bilər.
Bölgə təmsilçisinin qazandığı nəticələrdə müstəsna xidmətləri olan almaniyalı hücumçu Premyer Liqa üçün tapıntıdır.
Sürəti, ağıllı oyunu, driblinqləri və öldürücü zərbələri ilə adından söz etdirən Mikelsi heyətində görmək istəyən Azərbaycan klubları var ki,
keçidin baş tutması üçün “Şamaxı”nın tələb edəcəyi transfer haqqını ödəmək mütləqdir.
Səbəbkar Sportinfo.az-a verdiyi açıqlamada maraqlananların olduğunu gizlətməyib:
“Bildiyimə görə, soruşanlar və maraqlananlar var. Ancaq indiki məqamda bu barədə açıqlama verə, ad çəkə bilmərəm.
Bu dəqiqə “Sabah”la qarşıdakı oyunu düşünürəm (söhbət “Qarabağ”la oyundan sonra baş tutub – H.). Ondan sonra nə baş verəcəyini görəcəyik”.
Adil Nağıyevin gedişindən sonra kapitanlıq sarğısını qoluna bağlayan Leroy Mikels Premyer Liqada meydana çıxdığı 16 oyunda 4 qol və 3 assistlə yadda qalıb.
HƏBİB
