Sonuncu dəfə qələbə sevincini sentyabrda yaşayan “Şamaxı” növbəti məğlubiyyətini aldı.

Bölgə təmsilçisi doğma meydanda “Kəpəz”ə boyun əydi – 0:1.

Leroy Mikels meydanda ən yaxşılardan olmasına baxmayaraq, məhsuldarlıq baxımından komandasına kömək edə bilmədi.

Almaniyalı vinger Sportinfo.az-a verdiyi müsahibədə sualları cavablandırıb.

- Vacib oyunda yenilginin səbəbini nədə görürsən?

- Məğlubiyyəti haqq etdik və uduzduq. Yaxşı oynamadıq, üstünlük göstərə bilmədik. “Kəpəz”i təbrik edirəm, başqa deyəcək sözüm yoxdur.

- Problem nədədir, kimdədir?

- Problem yox, problemlər deyərdim. Kifayət qədərdir. “Kəpəz” əvvəldən sona qədər pressinq etməklə bizə istədiyimiz oyunu göstərməyə imkan vermədi. Rikardonun penaltini dəf etməsiylə dönüş yaradacağımızı düşünsəm də, alınmadı.

- Mövsümə yaxşı başlayıb 7 oyunda 12 xal toplamışdınız. Lakin son 7 qarşılaşmada cəmi 1 xal qazanmısınız. Nə baş verdi?

- Buna özüm də inana bilmirəm. İzah etmək, konkret səbəb göstərmək həqiqətən çətindir. Çempionatın əvvəlində nəticə qazanmaq bacarığımızı göstərmişdik. Ancaq sonradan işlər istədiyimiz kimi getmədi. Daha çox çalışmalı, daha istəkli olmalıylq. Ümid edirəm ki, qış fasiləsinə qədər xallarımızın sayını artıracağıq.

- Bu gedişlə qış fasiləsinə sonuncu pillədə yollanmasanız yaxşıdır.

- Bunun baş verəcəyini düşünmək belə istəmirəm. Aşağı yuvarlanmamaq üçün əlimizdən gələni edəcəyik. Artıq məğlubiyyət limitini doldurmuşuq. Yetər!

HƏBİB