Sportinfo.az “Şamaxı”nın almaniyalı hücumçusu Leroy Mikelsin müsahibəsini təqdim edir:

- “Neftçi” ilə dramatik oyunda 2:2-lik bərabərliyə nail oldunuz. Qarşılaşmanı necə şərh edərdiniz?

- Pozitiv nəticə qazandıq. “Neftçi” matça çox fəal başladı. Artıq 4-cü dəqiqədə hesab 0:2 idi. Buna baxmayaraq, biz geridönüş edə bildik. Buna görə də nəticədən məmnunuq.

- Qapınızda gördüyünüz erkən qolları nə ilə əlaqələndirərdiniz?

- Dəqiq səbəb deməkdə çətinlik çəkirəm. Amma əsas odur ki, geridönüş edə bildik.

- Bəs geridönüş etmək üçün özünüzdə güc necə tapdınız?

- Təbii ki, 4-cü dəqiqədə qapında 2 qol görmüsənsə, bundan sonra toparlanmaq çətindir. Təəssüf ki, matçın əvvəlində çox asan qollar buraxdıq. Amma buna baxmayaraq, özümüzə inamımızı itirmədik və yekunda 1 xal da olsa, qazandıq.

- Yəni, “Şamaxı” bu 1 xalı aktivinə yaza bilər?

- Əlbəttə. Geridönüş edə bilmişiksə, nəticədən razıyıq. Düzdür, yenə də fərqlənə bilərdik. Üçüncü qolu vurmaq üçün də şanslarımız oldu. Ümumi götürdükdə “Neftçi” kimi komandadan səfərdə 1 xal almaq da yaxşıdır. Son oyunlarda uğursuz çıxış edirdik. Ona görə də indiki məqamda qazanılan hər xal bizim üçün vacibdir.

- Bu turdan sonra çempionatda fasilə yaranır. Bu məqam “Şamaxı”nın lehinədir, yoxsa əleyhinə?

- Fasilə bizim üçün yaxşıdır. İndiki məqamda daha çox çalışmağımıza ehtiyac var. Ona görə də inanıram ki, fasilənin komandamıza faydası olacaq.

- Fasilədən sonra “Sumqayıt”la qarşılaşacaqsınız. Həmin oyundan gözləntiləriniz nədir?

- Çətin qarşılaşma olacaq. “Sumqayıt” güclü rəqibdir. Lakin bizim qələbəyə çox ehtiyacımız var. Neçə turdur 3 xal qazana bilmirik. Əlimizdən gələni edəcəyik ki, “Sumqayıt”la matçda meydanı qalib kimi tərk edək.