“Şamaxı”nın futbolçusu Rüfət Abbasov Sportinfo.az-a müsahibə verib.

Azərbaycanın U-21 millisinə də cəlb olunan müdafiəçi “Sumqayıt” üzərində qazanılan 1:0 hesablı qələbədən sonra sualları cavablandırıb.

- Premyer Liqanın debütantı 5 oyunda 8 xal qazanmağı bacarıb. Uğurlu çıxışın səbəbini nə ilə əlaqələndirə bilərsən?

- Yalnız və yalnız işləməklə. Demək olar sıfırdan yaranmış komandadır, ilk dəfədir birlikdə oynayırıq. Məşqçilərin verdiyi tapşırıqları yerinə yetirməyə çalışırıq. Gərgin məşqlərin nəticəsidir.

- “Sumqayıt”ı nəyin sayəsində məğlub etdiniz?

- Qolu lazım olan vaxtda vurduq. Məqsədimiz bacardıqca tez qol vurub, oyuna nəzarət etmək idi. Hesab açılandan sonra döyüşkənlik nümayiş etdirdik, ağıllı oynadıq. Əsas o idi ki, diqqəti əldən verməyək.

- Son 25-30 dəqiqədə “oturmuşdunuz”. Hətta baş məşqçi Ayxan Ababsov bir neçə epizodda müdafiədən çıxmaq göstərişi verirdi.

- Futbolda bu cür hallar olur. Dediyim kimi, ağıllı və diqqətli oynamağa çalışırdıq. Özünüz də görürdünüz ki, əks-hücumlar üçün yaxşı imkanlar yaxalayırdıq. Bəlkə də hesabın yaratdığı məcburiyyət idi.

- Növbəti rəqibiniz səfər matçında “Kəpəz” olacaq. Tovuza qələbə dalınca gedəcəksiniz, yoxsa 1 xalı da qənaətbəxş saymaq olar?

- Heç-heçəni düşünmək düzgün olmaz. Hər oyunda məqsədimiz 3 xaldır, bu dəfə də belə olacaq. İlk növbədə buraxılan səhvləri analiz edib aradan qaldırmalıyıq. Bunları edəndən sonra “Kəpəz”lə oyuna köklənib, qələbə haqda düşünəcəyik.

HƏBİB