Cavid Hüseynovla yolları ayıran "Səbail" qısa müddət sonra boş qalan postu onun köməkçisi olmuş Elvin Məmmədova həvalə etdi.

Bakılılar üçün qarşıda finala bərabər 8 tur var.

Görəsən, əhəmiyyətli matçlar öncəsi baş məşqçi dəyişikliyi Bayıl təmsilçisi nə vəd edir?

Məmmədovun ağır yükün altına girdiyi dəqiqdir.

Komanda ən yaxın izləyicisi "Kəpəz"dən 5 xal geri qalır.

Fərq o qədər də böyük görünməyə bilər. Amma nəzərə alanda ki, həmin "Kəpəz" qışdan sonra "Sabah", "Turan Tovuz", "Neftçi" kimi iddialı klubları məğlub edib, "Qarabağ" kimi hegemonla bərabərə qalıb, onda vəziyyət bir xeyli qəlizləşmiş olur.

Deməli, bölgə klubunu arxada qoymaq üçün əməlli-başlı tər axıtmaq lazım gələcək.

İlk cəhd arzuolun kimi olmadı. Komanda əsas rəqibi ilə Tovuzda bərabərliyə (1:1) razılaşdı.

Amma gənc mütəxəssis üçün üstünlüklər də yox deyil. Kənardan gəlməyib, klubun içindən biridir. Rəhbərlikdən ən siravi işçiyə qədər hər kəsi yaxından tanıyır.

Həlim xasiyyətli çalışdırıcının kollektiv daxilində yaxşı hörmətə sahib olduğu heç kəsə sirr deyil.

Baş məşqçi statusunda da bizə yad sayıla bilməz.

Şahin Diniyevin gedişindən sonra "Səbail"i bir oyun meydana çıxarmışdı. "Turan Tovuz"la bərabərliklə (1:1) bitən görüşdə "dənizçilər" kifayət qədər yaxşı təsir bağışlamışdı. Həmin matç da gələcəyə ümid verirdi. Düzdü, "Kəpəz" görüşdə onun komandası meydanda ürəkaçan futbolla yadda qalmadı.

Lakin 2 oyunla barəsində ciddi nəsə demək tezdir. Bu dəfə daha uzun vadədə tanımaq fürsətimiz olacaq.

36 yaşlı mütəxəssisin köməkçi seçimi də diqqətçəkən oldu. O, baş məşqçi kimi "Cəbrayıl"da özünü yaxşı tərəfdən göstərən Elhad Nəzirini yanına gətirdi.

İkili özünü təsdiqləmək üçün alışıb-yanır. Qalır bu hirsi psixoloji olaraq "ölən" futbolçulara aşılamaq.

Ən əsası yeni baş məşqçi məsuliyyətdən azaddır. Hər hansı təzyiq hiss etmədən işinə fokuslana bilər.

"Səbail" liqada saxlaya bilsə, şübhəsiz nəticə Məmmədovun aktivinə yazılacaq.

Amma uğursuzluqda onu günahkar kürsüsünə əyləşdirmək ədalətli görünməyəcək. Ki, bu komandanı Şahin Diniyev yığıb, Cavid Hüseynov da əlavələr edib. Elvin Məmmədov isə olar-olmaz prinsipi ilə yola davam edəcək.

XANOĞLAN İMANOV