Doqquz turluq aradan sonra ilk qələbə! həm də necə bir qələbə! Tam qızıl dəyərində.
«Səbail» Cavid Hüseynovla çıxdığı altıncı matçda 3 xalın ləzzətini daddı.
Axırıncı dəfə ötən ilin oktyabrında qalibiyyətin dadını çıxarmış komanda dünən Sumqayıtda baxımlı və istəkli oyunu ilə uğurlu nəticəni haqq etdi.
Biz bunu baş məşqçi dəyişikliyindən sonra «Səbail»in gözəl futbolla qazandığı ilk qələbə kimi hələ bir müddət xatırlayacağıq.
«Səbail» hər iki hissədə «Sumqayıt»ı meydandan «silib-süpürdü». Vaxtilə Samir Abasovun bəyənməyib düşərgədən uzaqlaşdırdığı Rüfət Abdullazadə dubla imza atdı.
İkinci qol çox qəşəng alındı, dönə-dönə izləyən doymaz yəni!
Onun qaçırdığı bir epizod da var, tam bir şansızlıq!
Lap yaxın məsafədən boş qapıya düşə bilməyən Rüfətlə yanaşı, Madi Queta və Suleyman Alluşun qaçırdığı epizodları gərək yaddan çıxarmayaq. Bunlar da qol olmadı ki, «Səbail»in böyükhesablı qələbəsindən danışaq.
Cavid Hüseynovun əl-qol bağlıdır yenə. Klubun başında dayananlar ona büdcə ayırmır ki, bir-iki normal transfer etsin.
Bu heyət hara qədər dartar, demək olmur.
Zədədən və cəzadan yan qaça bilsələr, sonadək Premyer Liqada qalmaq mücadiləsi verəcəklərini iddia edərdik.
Çox çətin, amma mümkündür.
ELXAN
