“Öncə onu qeyd edim ki, mən heç vaxt klubda baş menecer vəzifəsində çalışmamışam.
Klubda seleksiyaçı məşqçi kimi fəaliyyət göstərmişəm və hazırda da fəaliyyətimi davam etdirirəm”.
“Səbail”in seleksiya qrupunun əməkdaşı Vüqar Bəybalayev Sportinfo.az-a açıqlamasına bu sözlərlə başlayıb.
Saytımızda dərc olunan xəbərdə keçmiş futbolçunun 2 ildir çalışdığı klubdan baş məşqçi Cavid Hüseynovun tələbi ilə uzaqlaşdırıldığı bildirilmişdi.
Bəybalayev əsas komandadan ayrıldığını təsdiq etsə də, klubdakı işinə davam edəcəyini deyib:
“Elvin Məmmədovla birlikdə U-19 komandamızda məşqçi kimi fəaliyyət göstərirdik.
Cavid Hüseynov əsas komandanın baş məşqçisi təyin olunduqdan sonra biz də əsas komandada köməkçi kimi fəaliyyətə başladıq. Hər iki komandada paralel olaraq çalışırdıq.
Lakin Premyer Liqanın qış fasiləsində vaxt məhdudiyyətini, bir neçə istiqamətdə çalışmağın fiziki olaraq çətin olduğunu nəzərə alıb ortaq qərara gəldik.
Ki, mən U-19 komandasında, Elvin Məmmədov isə yalnız əsas komandada fəaliyyətini davam etdirsin. Bununla yanaşı, daha öncə olduğu kimi, kluba seleksiya xidmətinin əməkdaşı kimi xidmət edəcəyəm”.
HƏBİB
