![Aranı qatırmış, ab-havanı korlayırmış… Kapitanın ayrılıq SƏBƏBLƏRİ](https://www.sportinfo.az/media/2024/05/29/img_20240528_wa00221716910132.jpg)
Dünən "Səbail"də ilk ayrılıq gerçəkləşib.
Müdafiəçi Adil Nağıyev Bayıl təmsilçisini tərk edib.
O, 019-cu ilin yayından "Səbail"də çıxış edirdi.
28 yaşlı mərkəz müdafiəçisi son mövsümdə komandanın heyətində meydana çıxdığı 20 rəsmi matçda 1 qol ötürməsi ilə yadda qalıb.
Abşeronun keçmiş icra başçısı Adil Nağıyevin eyniadlı nəvəsi "dənizçilər"in düşərgəsini öz istəyi ilə tərk etməyib. Heç arada pul söhbəti də olmayıb.
Kapitanın niyyəti burada qalmaq idi, sadəcə… Şahin Diniyev onu idarəçilərin "ayağına verib".
Baş məşqçi rəhbərliklə söhbətində iddia edib ki, komandanın uğursuz mövsüm keçirməsinin səbəbkarı bir neçə futbolçudur.
Guya onlar verilən tapşırıqları aşağı səviyyədə yerinə yetirib, kollektiv daxilində ab-havanı korlayıb, dəfələrlə nizam-intizamı pozub.
Diniyev bu oyunçuların arasında Adilin adını birinci qeyd edib.
Hadisənin "fitil"i isə ötən həftəsonu çəkilib. Belə ki, “Səbail”in məşqçi və futbolçuları “Xəzər Dəniz Gəmiçiliyi”nin (ASCO) İdarə Heyətinin sədri Rauf Vəliyevi möhkəm əsəbiləşdirib.
Komandanın cari mövsüm bərbad keçirməsi onu qəzəbləndirib.
Premyer Liqanın son turunda keçirilən “Zirə” ilə matçı canlı izləyən klubun Müşahidə Şurasının sədri baş hakimin final fitinin ardından paltardəyişmə otağına enib.
O, sezonu 0:1 hesablı məğlubiyyətlə qapadan oyunçuları nəyi var danlayıb. Vəliyev dayanmadan 20 dəqiqə onları tənbeh edib.
“Səbail”ə milyonlarla manat vəsait ayırdığını, hər cür şərait yaratdığını, amma nəticələrin onda çox pis təəssürat yaratdığını deyib.
Himayədar şəxs bildirib ki, komandanın turnir cədvəlinin orta sıralarında görməyi qarşıya məqsəd qoysa da, gözləntiləri doğrulmayıb.
Qeyd edib ki, gedişat onu qətiyyən qane etmir və qısa zamanda islahatlara başlayacaq.
Rauf bəy islahatlar deyəndə nəyi nəzərdə tutmasına da açıq işarə vurub. Söyləyib ki, büdcə azalacaq, yüksəködənişli legionerlər, o cümlədən, yerlilər yola salınacaq.
Rəhbər Şahin Diniyevə necə yanaşıb? Baş məşqçiyə üz göstərməyib.
Vəliyev kollektivin ünvanına sərt tənqidlər səsləndirərkən, o da digərləri kimi başını aşağı salıb.
SPORTİNFO.AZ