![“Biz oyunumuzdakı mənfi və müsbət məqamları burada gördük”](https://www.sportinfo.az/media/2024/07/13/boyan-letic_(1).jpg)
“Bu matçlarda oyunumuzda mənfi və müsbət məqamları gördük”.
“Sabah”ın müdafiəçisi Boyan Letiç Sportinfo.az-a açıqlamasında belə deyib.
Bunadək yerli "Koper"ə qalib gələn (1:0) və Serbiya "Çukariçki "si ilə heç-heçə edən (0:0) "Sabah" daha 1 yoxlama oyunu keçirəcək.
Komanda iyulun 17-də Ukraynadan “Rux” (Lvov) ilə qarşılaşacaq. "Bayquşlar" iyulun 18-də Bakıya qayıdacaq.
31 yaşlı serbiyalı bosniyalı legioner Sloveniya toplanışı çərçivəsində arxada qoyduqları iki yoxlama matçı barədə fikirlərini bizimlə bölüşüb:
"İlk oyunda qalib gəldik. Komandanın özünə inamına görə qalib gəlməyimiz vacib idi.
Lakin yoxlama oyunlarının əsas üstünlüyü, bu cür oyunlarda komandanın çatışmayan cəhətlərini görməyimizdir.
Pisləri düzəltməli, yaxşıları isə daha da təkmilləşdirməyə davam etməliyik. Qarşıdakı matçlara həm taktiki, həm də fiziki cəhətdən hazırlaşmalı, sərgiləməyi hədəflədiyimiz oyun modelini daha da təkmilləşdirməliyik.
Düşünürəm ki, komanda oyundan oyuna daha yaxşı olacaq".