"Sabah"ın baş məşqçisi Vasili Berezutski Azərbaycan kubokunun cavab oyunlarında "Neftçi" ilə matçı şərh edib.
Sportinfo.az xəbər verir ki, ilk oyunda qalib gələn Masazır təmsilçisi (2:1),1:1 hesablı heç-heçə edərək turnirin final mərhələsinə adlayıb.
Klubun çalışdırıcısı bununla bağlı deyib:
"Bir addımımız qalıb. Bu tituldur, prestijdir. Əlimizdən gələni edəcəyik ki, onu qazanaq. Növbəti liqa matçımızda rotasiyalarla oynayacağıq. 4 gündə üçüncü oyunumuzu oynayacağıq. Finalda isə hər şey ola bilər. Hazırlaşacağıq. Mübarizə aparacağıq".
Mütəxəssis ilk oyunla müqayisədə bugünkü görüşdə daha zəif təsir bağışlamaqları haqda belə deyib:
"Düşünürəm ki, ikinci hissədə dominant futbol oynayırdıq. Qol vurmaq üçün şanslarımız var idi. Əsas odur ki, finaldayıq".
O, kubokun finalına adlamağa baxmayaraq, ölkə çempionatı oyunlarına diqqət yetirəcəklərini qeyd edib:
"Çempionatın hər matçı bizim üçün önəmli olacaq. Biz hər oyuna qələbə üçün çıxacağıq".
V. Berezutski məşqçilk karyerasında ona dəstək olan rusiyalı mütəxəssis Leonid Slutskini final oyununa çağıracağını da bildirib:
"Məmnuniyyətlə onu dəvət edərdim. Çindəki oyun qrafiklərini bilmirəm. Düşünürəm ki, dəvət etsəm, böyük məmnuniyyətlə gəlib oyuna baxar".
