Ötən mövsüm “Araz-Naxçıvan”da əla sezon keçirən Abdulla Rzayevi “gördüm” deyən yoxdur.
Yayda müqavilə ilə məxsus olduğu “Sabah”a qayıdan 22 yaşlı futbolçu Krunoslav Renduliçin dövründə demək olar şans qazanmadı.
Futbolçu eyni münasibəti yeni çalışdırıcı Vasili Berezutskidən də görməkdədir.
İndi Abdullanın əsas istəyi ehtiyat oyunçular skamyasının bəzəyinə çevrilmək yox, daim şans qazanacağı ünvana üz tutmaqdır.
Hətta bunun üçün Premyer Liqa klublarından təklifləri də var.
Di gəl, “Sabah” onu heç bir halda buraxmaq istəmir. Nə transferə çıxarmaq fikri var, nə də icarəyə vermək.
Halbuki, onun yer aldığı sağ cinahda Amin Seydiyevlə yanaşı, Tellur Mütəllimov, yeri gəlsə, Şakir Seyidov yer alır.
Bu, futbolçunu göz görə-görə məhv etmək deyilsə, bəs, nədir?
Rzayev cari mövsümdə elitada cəmi 2 oyunun iştirakçısı olmaqla 1 assistlə yadda qalıb.
Ötən mövsüm “Araz-Naxçıvan”da 28 qarşılaşmada forma geyinməklə aktivinə 1 qol və məhsuldar ötürmə yazdırmışdı.
HƏBİB / SPORTİNFO.AZ
