.jpg)
“Sabah” yerdeyişmə etməyə hazırlaşır. “Bayquşlar” yeni ildən sonra Masazırdan Şüvəlana köçəcək.
Murad Musayevin çalışdırdığı komanda 2024-cü ilin əvvəlindən AZAL PFK-nın keçmiş bazasında məskunlaşacaq.
2016-cı ilin yayında fəaliyyətini dayandırmış “təyyarəçilər”in təlim-məşq mərkəzi və oteli artıq “Sabah”ın ixtiyarına verilib.
Komanda gündəlik məşqləri Şüvəlanda keçəcək, burada qalacaq, rəqiblərini yenə Masazırda qəbul edəcək.
Adıçəkilən klub tərəfindən uzunmüddətli icarəyə götürülən “AZAL Arena”da yenidənqurma prosesi başlayıb.
İllərdir istifadə olunmayan stadionda işlər qazondan start götürüb.
Süni meydança artıq sökülüb. Planda bir dəyişiklik baş verməsə, buranın ot örtüyü təbii olacaq.
Şüvəlanda yerləşən futbol qurğusu 2011-ci ildə istifadəyə verilib.
Azarkeş tutumu 3500 nəfər olan stadiondan 2016-ci ilədək AZAL PFK istifadə edib. Növbəti 2 mövsümdə isə “Şüvəlan” arenadan yararlanıb.
SPORTİNFO.AZ
