«Kəpəz»in sabiq hücumçusu Abdulla Şuaybunu Azərbaycana qaytaran «Qəbələ» seleksiya xarakterli toplanışı davam etdirir.
Növbəti mövsümdən I Liqada mübarizə aparacaq «qırmızı-qaralar» hazırda bir neçə oyunçunu baxışdan keçirir.
Onların arasında 3 legioner də yer alır.
Əcnəbilərdən biri Braziliyadan, digərləri isə Qana və Seneqaldandır. Maraqlıdır ki, Kaxaber Sxadadzenin gözü qarşısında olanların üçü də ampluaca hücumçudur.
Seleksiya xarakterli hazırlıq prosesi bir həftə davam edəcək.
Ardınca “Qəbələ”nin təlim-məşq toplanışına start veriləcək. Hazırlıq prosesi Qəbələ şəhər stadionunda gerçəkləşəcək.
Mövsümün startına qədər yoxlama oyunlarının keçirilməsi planlaşdırılıb. İlk matç iyulun 31-də baş tutacaq.
“Qırmızı-qaralar” Qəbələdə təlim-məşq toplanışında olan Küveytin "Əl-Yarmuk" klubu ilə üz-üzə gələcək. Digər yoxlama oyunlarının tarixi və rəqiblər barədə ictimaiyyətə məlumat veriləcək.
I Liqada yeni mövsümə sentyabrın 11-də start veriləcək. Yarışın püşkatma mərasimi avqustun 13-də AFFA-nın inzibati binasında təşkil olunacaq.
SPORTİNFO.AZ
