![Qurban Qurbanov sözünü dedi: "Bu, bizi aldatmamalıdır"](https://www.sportinfo.az/media/2024/07/17/451094136_1030820195079681_5523586818817538964_n.jpg)
"Qeydə alınan hesab bizi aldatmamalıdır".
Sportinfo.az xəbər verir ki, bunu "Qarabağ"ın baş məşqçisi Qurban Qurbanov klubun rəsmi saytına açıqlamasında deyib.
Təcrübəli mütəxəssis bu gün Avstriyada keçirdikləri yoxlama görüşləri ilə bağlı fikirlərini bölüşüb:
“Toplanışın 12 günü ərzində çox yaxşı işlər görən texniki heyətə və futbolçulara təşəkkür edirəm. Hazırlıq prosesinin sonluğu da yaxşı alındı.
Bu matçlar da əvvəlki iki qarşılaşma kimi dinamik, baxımlı keçdi. Qeydə alınan hesab bizi aldatmamalıdır.
İki çox yaxşı komandaya qarşı oynayırdıq. “Əl-Şəbab"ın baş məşqçisi Paulo Souzanı öncədən də tanıyırdıq.
Təcrübəli mütəxəssis Avropa Liqasında rəqibimiz olan “Fiorentina”nı çalışdırırdı.
Bütün futbolçular 90 dəqiqə oynadı və sonadək tempi aşağı salmadılar. Yekunda yaxşı qələbə, yaxşı oyun və ümumilikdə inamlı hazırlıq oldu.
Toplanışdan razı qaldım, komandamız çox yaxşı hazırlıq keçdi”.
"Qarabağ" günün ilk yoxlama görüşündə Xorvatiyanın “Slaven” klubunu 1:0, növbəti matçda isə Birləşmiş Ərəb Əmirliklərinin “Əl-Şabab” kollektivini 5:2 hesabı ilə məğlub edib.