Günlərdir hamı planşetdən danışır.

Qurban Qurbanovun bir təpik zərbəsiylə paramparça olan o planşetdən.

Hərə bir cür yozur bu epizodu. Fikir verirəm, mütləq əksəriyyət hesab edir ki, Qurbanov penalti qərarından kəskin narazı qaldığından, əsəblərinə hakim ola bilməyib.

«Araz-Naxçıvan»la ölkə kubokunun yarımfinal mərhələsinin ilk oyununda qeydə alınan epizodu mən də dəfələrlə izləmişəm.

Elçin Məsiyevin VAR kamerasına baxandan sonra verdiyi qərarla razılaşıram - Yassin Benzia həqiqətən rəqibinə qarşı kobudluq etmişdi.

İşdir, referi VAR-ı gözdən keçirib də başqa qərar çıxarsaydı, məncə, bu, daha böyük rezonans doğurardı.

Qurban Qurbanovun sərt, hətta deyərdim ki, çoxları tərəfindən təəccüblə qarşılanan bu reaksiyasına, əslində, nə heyrət etmək lazımdır, nə də başqa bir şey.

Bu, illərlə, aylarla yığılan aqressiyanın partlama ani idi. Bu, gec-tez baş verməli idi. Bu, mütləq olmalı idi.

Sadəcə, vaxtı bilinmirdi. O da gəlib «Araz-Naxçıvan»la matça təsadüf etdi.

O əvvəl idi - nə olur olsun, Qurban Qurbanov dinmir, danışmırdı. Həmişə susur, sakitliyini qoruyurdu. Adının hansısa qalmaqala qarışmasına imkan vermirdi.

Ancaq su kimi axıb keçən zaman ona da göstərdi ki, susmaq heç də həmişə qızıl qiyməti daşımır. İnsandır, robot deyil.

Hissi, duyğuları var.

O da bizlərdən birir – yeyir, içir, nəfəs alır, ruh aləmi daşdan, dəmirdən təşkil olunmayıb. Görür, düşünür, bəzən özündən çıxır.

Qurban Qurbanov hədsiz həssasdır. Onu tanımayanlar, daxili aləmini bilməyənlər bunu başa düşməz, bilməz.

Hər şeyi ürəyinə salan, özü-özüylə danışan, sözdən, baxışdan sarsılan, yaxud şadlanan biridir.

Eşitdiyi bir kəlmə Qurbanovu dünyanın ən xoşbəxti də edə bilər, göyün yeddinci qatından yerə endirə də bilər.

Onunla münasibətdə gərək maksimum dərəcədə ehtiyatlı və tədbirli olasan.

Belə insanların gərək xətrinə dəyməyəsən. İşlətdiyin kəlmənin, etdiyin hərəkətin fərqinə, mahiyyətinə varasan. Dediyin sözün ona necə təsir edəcəyini öncədən düşünəsən.

Çün belə insanların öz aləmi, dünyası olur, ora isə hər kəsi yaxın buraxmırlar, qapısından içəri keçirmir, «buyur, yuxarı başda əyləş» demirlər.

Səni sevə də bilər, sevməyə də bilər.

Bu, daha çox səndən asılıdır. Özünü necə aparacaqsan, nə deyəcəksən, bax, ən önəmlisi budur.

Qurban Qurban o hərəkəti heç vaxt etməzdi. 16 ildən çoxdur futbol naminə, «Qarabağ» naminə gördüyü böyük işlərə ümumi münasibətdir onu hiddətləndirən, qəzəbləndirən.

Bu, bir penalti qərarına görə səbr kasasının dolub-daşması deyildi. Oysa ki, meydanda belə halları o qədər görüb ki…

İstər ölkədaxili, istərsə də beynəlxalq miqyasda keçirilən oyunlar zamanı. Qurban Qurbanovu, belə demək olarsa, cin atına mindərən ölkənin futbol həyatına məsul çevrələr, onların yanaşmasıdır.

Azərbaycanın ən yaxşı və ən güclü məşqçisinin etirazı, əslində, həmin dairələrə, şəxslərədir.

Hansı ki, respublikanın futbol həyatının ölü nöqtədən tərpədilməsi, inkişafı üçün ondan istifadə etmirlər, məsləhətlərinə qulaq vermirlər, səsləndirdiyi təklifləri nəzərə almırlar.

Düzdür, bunların bir çoxu mediaya çıxmır, geniş ictimaiyyət bağlı qapılar arxasında gedən müzakirələrdən əksər hallarda xəbərsizdir.

Ancaq Qurbanovun özü bütün bu proseslərin içindədir, mərkəzindədir. Və nələr olur, nələr olmur, çox yaxşı bilir və görür.

Əsəbi reaksiya həmin işlərin onda yaratdığı təlatüm və narazılıqdır. Qurban Qurbanova pis təsir edən odur ki, onun futbol qarşısında xidmətləri, topladığı nəhəng təcrübə tam mənasıyla əsas götürülmür.

Yalvara-yalvara çağırırlar, dinləyirlər, sonra yenə öz bildiklərini edirlər - bu, kimi yerindən oynatmaz, əsəbləşdirməz ki?

O. sakit təbiətli biridir. Amma içində bir Qurban da var. Bəli, məhz o Qurban qarşılaşdığı bütün bu neqativ hallarla barışmaq istəmir.

O Qurban artıq kükrəyir, dözə bilmir.

O Qurbanov etiraz etmək, «daha bəsdirin» demək istəyir və buyurun, artıq deyir.

Və deyəcək də! O, bundan sonra gördüyümüz sakit Qurban olmayacaq. Hər hadisə reaksiya verəcək, sərt danışacaq.

Və danışmalıdır da! Çünki danışmadıqca, adamın çiyinlərinə çıxırlar, aşağı basırlar.

Onun ayağının bildiyini başları ilə bilməyənlərin say çoxluğu yaradaq ətrafında çəmbər yaratmasına səssiz qalarsa, Allahın bir günü ürəyi də ağaracaq. Bir neçə ilin içində saçını ağappaq ağartdığı kimi.

Qurban Qurbanov futbola qarasaçlı, qaraqaşlı oğlan kimi gəlmişdi. Futbol isə Qurban Qurbanovu ağsaçlı, alnı qırış-qırış qoca kimi geri qaytarır.

ELNUR