Qış istirahətini başa vuran “Qarabağ”ın məşqçi və futbolçu heyəti bir araya gəlib.
Yanvarın 3-dən başlayan hazırlıqlar “Azersun Arena”nın təlim-məşq bazasında davam edir.
Kollektiv tam tərkibdə yığışıb. Hətta son günlər adı mətbuatda çox hallanan və “Sevilya”ya transferi gözlənilən Olavio Juninyo da düşərgədədir.
Yeganə istisna Yassin Benziadır. Əlcəzairli yarımmüdafiəçi ailəsindəki ciddi narahatlığa görə Azərbaycana gəlməyib.
“7 nömrə” məsələnin mahiyyəti barədə Qurban Qurbanovu xəbərdar edərək bir neçə günlük icazə istəyib. Benzianın yaxın günlərdə ölkəmizə gələcəyi gözlənilir.
Maraq üçün bildirək ki, “Qarabağ” fasilə dönəmində iki yoldaşlıq görüşü keçirəcək. Yanvarın 9-dakı rəqibin adı “Kəpəz”dirsə, ağdamlılar 3 gün sonra “Zirə” ilə üz-üzə gələcək.
HƏBİB / SPORTİNFO.AZ
