Bu gün Azərbaycan kubokunun yarımfinal mərhələsinin ilk görüşləri baş tutacaq.

Həm “Araz-Naxçıvan” – “Qarabağ”, həm də “Neftçi” – “Sabah” qarşılaşmaları özlüyündə müəyyən prinsipallıq daşıyır ki, oyunların son dərəcə gərgin keçəcəyinə şübhə yoxdur.

8 martdakı olay

Martın 8-nə qədər ağdamlılarla naxçıvanlılar arasında hansısa gərginlikdən danışa bilməzdik. Ötən mövsümdən etibarən Premyer Liqada üz-üzə gələn komandaların matçları öz axarında davam edir, sakit formada başa çatırdı.

Lakin ötən ay “Liv Bona Dea Arena”da gerçəkləşən duelin ikinci yarısında ciddi qalmaqal yaşandı. Felipe Santosla Yassin Benzia arasında yaşanan mübahisəyə Karlos Jatoba müdaxilə edincə, sillə və təpiklər havada axışdı.

Nəticədə oyun vaxtı Santos meydandan qovuldu, İntizam Komitəsinin iclasında Elvin Cəfərquliyevlə Musa Qurbanlıya da “qırmızı göstərildi”.

Məhz bu davadan sonra Felipenin kubok matçlarında “Qarabağ”lılar tərəfindən necə qarşılanacağı və ikili mübarizələr zamanı nələrin yaşanacağını həvəslə gözləməyə dəyər.

Qurbanov 2 il əvvəli unudub?

2022/23 mövsümündə püşk ölkə kubokunun 1/4 final mərhələsində “Qarabağ”ı “Qəbələ”yə rəqib etmişdi. O dönəmdə bölgə təmsilçisini Elmar Baxşıyev, “köhlən atlar”ı isə adəti üzrə Qurban Qurbanov çalışdırırdı.

Bakıdakı ilk oyun 2:2 hesabı ilə sona çatmışdı. Qəbələdəki görüş son dərəcə gərgin keçsə də, meydan sahibləri vurulan yeganə qolla yarımfinala yüksəlmək imkanı yaxalamışdı.

Beləliklə, 2 il əvvəl Elmar Baxşıyev Qurban Qurbanova əsl sürpriz yaşatmağı bacarmışdı. Və həmin Baxşıyev indi “Araz”ın “sükanı” arxasında yenidən Qurbanova rəqibdir.

Elmar bəyin məşqçilik təcrübəsində özündən qat-qat təcrübəli həmkarı üzərində növbəti zəfəri böyük rezonans doğura bilər. Maraqlı məqam odur ki, “Qarabağ” son 8 ildə ardıcıl 2 mövsümdə ölkə kubokunu başı üzərinə qaldıra bilməyib.

“Liv Bona Dea Arena”da gerçəkləşəcək qarşılaşma saat 17:00-da start götürəcək.

HƏBİB / SPORTİNFO.AZ