“Qarabağ” növbəti, cari avrokubok mövsümündə sonuncu sınaq qarşısındadır.
Azərbaycanın Avropadakı qüruru, ölkəmizin dəyişməz çempionu səfərdə “Olimpiakos”u qəbul edəcək.
Hazırkı durumda komandaların vəziyyəti və hədəfləri fərqlidir. Aktivində 12 xal olan yunanlıar Avropa Liqasının pley-offuna birbaşa vəsiqə qazanmağın planlarını cızdığı halda, 3 xala sahib “köhlən atlar” sonuncu olmamaq, mümkün qədər irəliləmək həvəsindədir.
“Olimpiakos” son illərdə azərbaycanlı futbolçulara kifayət qədər tanış rəqibdir. “Neftçi” 2021-ci ilin yayında bu rəqiblə matçlarda hər iki halda 0:1 hesabı ilə uduzmuşdusa, 1 il sonra elə həmin “Qarabağ” Yunanıstan nəhənginə səfər qarşılaşmasında 3:0 hesabı ilə qalib gəlmişdi. Bakıdakı dueldə isə hesab açılmamışdı.
Lakin bu “Olimpiakos” o “Olimpiakos” deyil.
Nüfuzlu iş adamı Miltiadis Marinakisin 2005-ci ildən klub üçün etdiyi yatırımlar təxminən 20 ildən sonra müsbət nəticəsini verməkdədir.
“Qırmızı-ağlar” son 1 ildə tarixinin ən şanlı dönəmini yaşayır ki, “Qarabağ”ın rəqibinin hazırkı durumunu faktlarla təqdim edirik.
* Konfrans Liqasının 2023/24 mövsümünün finalında “Fiorentina”nı 1:0 məğlub edən yunanlar tarixində ilk dəfə avrokubok titulunu qazanıb.
* Ötən il Konfrans Liqasının qalibi olan heyət böyük ölçüdə qorunub-saxlanıb, hətta gücləndirilib.
* Klubun büdcəsi 112.5 milyon avro təşkil edir ki, ən bahalı futbolçuları argentinalı Santyaqo Hezzenin bazar dəyəri 12 milyon avrodur.
* “Olimpiakos” ötən yay – mövsümlərarası fasilə dönəmində 8 yoldaşlıq görüşü keçirib ki, burada “Ayaks”, “Roma”, “Nottingem Forest” kimi rəqiblərlə qarşılaşıb.
* “Olimpiakos” cari avrokubok mövsümündə yalnız 1 oyunda – ilk turda “Lion”a məğlub olub. Öz meydanında ümumiyyətlə uduzmayıb. Yunanıstan çempionatı, ölkə kuboku və Avropa Liqası çərçivəsində “Karaiskakis” stadionunda 14 oyun keçirən “qırmızı-ağlar” yenilgi acısı yaşamayıb.
Yuxarıda göstərilən faktlar səfərdən qələbə ilə qayıtmasını arzuladığın(m)ız “Qarabağ”ın rəqibi haqdadır. Yəqin ki, arada nə qədər fərqin olduğunu gördünüz. Şərh sizdə.
Yanvarın 30-da baş tutacaq qarşılaşma Bakı vaxtı ilə saat 00:00-da start götürəcək.
HƏBİB / SPORTİNFO.AZ
