Yeni nəfəs, yeni nəfəs, yeni nəfəs.
Mən bunun söhbətini etmirəm.
«Qarabağ» həmin mərhələni çoxdan keçib, cənablar! İllər əvvəl yaşanıb bu era.
Artıq fərqli tipajlar gəlməlidir «Qarabağ»a. 500-600 min dollarlıq legionerlərlə eyni nəticələri təkrarlamaq çətindir.
Yeni hədəflərə çatmaq üçün transfer büdcəsini, heç olmasa, 2-3 dəfə artırmaq şərtdir.
Sən artırmayacaqsan, hər dəfə «Braqa ilə, «Bayer «ilə başabaş, dişə-diş mücadilə verə bilməyəcəksən, yıxılıb qalacaqsan bir küncdə.
Gələn də cırmaq atacaq, gedən də.
Bunun olmaması və böyümək üçün tək çarə büdcəyə bağlıdır.
Elə futbolçular gətirəcəksən ki, Olavio Juninyo kimi 200 min avro artıq maaşa görə ölkəsinə qaça-qaca dönməyəcək, illərlə sənə, caminə xidmət edəcək.
Canıyla, qanıyla, ruhuyla sənin üçün vuruşacaq, o formanın haqqını verəcək, hər yayın başında gəlib, «mənə filan təklif var» deməyəcək, pulunu artırmağın əyri-üyrü bəhanələrinə baş vurmayacaq.
«Qarabağ» artıq belələrini tapmalı, çalışıb gətirməlidir. Axı könlü balıq istəyən dənizin ləpədöyənində dayanıb, gözünü suya dikməməlidir.
Çırmanmalı, balağını o suda islatmalıdır.
ELXAN
