«Hər an hər şey ola bilər».
Bu sözləri Sportinfo.az-a açıqlamasında «Qarabağ»ın direktoru Əmrah Çəlikəl deyib.
Əldə etdiyimiz informasiyaya görə, Azərbaycan çempionu uzun müddətdir danışıqlar apardığı legionerlərdən biriylə, nəhayət ki, razılıq əldə eləyə bilib.
Qurban Qurbanovun xidmətinə maraq göstərdiyi əcnəbi Qanadandır. Yarımmüdafiə xəttində çıxış edən afrikalı Azərbaycana gəlməyə razılaşıb.
Onun məxsus olduğu klub da bu keçidə «okey» verib, indi tərəflər arasında təzminat mövzusunda bəzi xırda detalların müzakirəsi gedir.
Son anda hansısa bir ciddi nüans ortaya çıxmasa, «köhlən atlar» 2025-ci ilin ilk transfer çalışmasını tezliklə rəsmiləşdirəcək.
«Qarabağ»ın bir nömrəli funkesioneri bu xəbərlə bağlı aşağıdakıları söyləyib:
«Bəlkə də məşqçilər korpusu kimisə bəyənib. Mən bu barədə heç nə deyə bilmərəm.
Çünki hələ rəhbərliyə gəlib çatan nəsə yoxdur. Qurban Qurbanov bugünədək bizə deməyib ki, «x» futboçlusunu bəyənmişəm, onunla danışmaq və müqavilə bağlamaq lazımdır.
Baş məşqçimiz hansı futbolçusunu istəsə, çalışıb onu gətirəcəyik. Gəlin, bir qədər də gözləyək.
Transfer pəncərəsi hazırda açıqdır. Pəncərənin açıq qaldığı son günə kimi bu yöndə işləyəcəyimizə şübhəniz olmasın».
