“Qarabağ”da parlayan Olavio Juninyo artıq “Flamenqo”nun düşərgəsindədir.
Azərbaycandakı çıxışları ilə Braziliya nəhənginin diqqətini çəkən 28 yaşlı hücumçuya vətənində böyük ümidlər bəsləyirlər.
Elə buna görədir ki, Juninyonun “qırmızı-qaralar”la müqavilə bağlaması böyük səs-küyə səbəb olub.
Bunu görmək üçün klubun “instagram” səhifəsinə diqqət yetirmək kifayət edir. Yeni transferlə bağlı paylaşımlar gündəmdə bomba effekti yaradıb.
Təbii ki, burada azərbaycanlı futbolsevərlərin də böyük rolu var. Bəyənmələrin və yazılan şərhlərin müəyyən qismində həmyerlilərimizin “imza”sı görünür.
“Flamenqo” bir gün ərzində Juninyo ilə bağlı iki post paylaşıb. Rəqəmlərdən xəbəriniz var?
Təxminən 550 min bəyənmə, 10 minə yaxın şərh və 45 min repost.
Bu transferin gerçəkləşməsindən sonra klubun “instagram” hesabının izləyici sayında da diqqətçəkən artım müşahidə olunmaqdadır.
Braziliya klubu sonuncu dəfə bəlkə də Ronaldinyonun dönəmində bu dərəcədə gündəmə gəlmişdi.
“Flamenqo” rəhbərliyi Juninyonu heyətinə qatmaqla, necə deyərlər, bir güllə ilə iki quş vurub. Həm heyətini gücləndirib, həm də xeyli sayda azərbaycanlı azarkeş qazanıb.
Olavio 2023-cü ilin yayından “Qarabağ”ın heyətində meydana çıxdığı 81 oyunda 41 qol və 14 assistlə yadda qalıb. Onun keçidi “köhlən atlar”a 5 milyon avro qazandırıb.
HƏBİB / SPORTİNFO.AZ
