Olavio Juninyo “Qarabağ”da son saatlarını keçirir.
Braziliyalı hücumçunun bu gün İspaniyaya yollanması planlaşdırılıb.
Onun “Sevilya”ya transferinə razılıq verən Ağdam klubu qarşı tərəflə bütün məsələlərdə ortaq məxrəcə gəlib.
İspanlar “Qarabağ”a 4 milyon avro ödəyəcək. 2+1 illik kontrakta imza atması gözlənilən Juninyo La Liqada uğurlu olarsa, təmsilçimiz bonuslardan daha 1 milyon avro qazana biləcək.
«Sambaçı»nın sonradan başqa bir kluba transferi də “Qarabağ”a pul qazandıracaq.
Belə ki, «köhlən atlar» müqaviləyə növbəti satışdan 20 faizlik payın təmsilçimizə çatması haqda bənd saldıra bilib.
Cənubi amerikalı «Sevilya»dan ötrü indi qanad çalır. Transferin baş tutması üçün iki aydır aləmi bir-birinə vuran forvardın yuxusuz gecələri başa çatmaq üzrədir.
Çünki La Liqada çıxış etmək 29 yaşlı legionerin ən böyük arzusudur. Əndəlüs klubunun idman direktoru Viktor Orta və baş məşqçi Qarsiya Pimyenta ilə bu haqda danışıb.
Hər iki şəxs Juninyonu əmin edib ki, onu «Sevilya»da böyük səbirsizliklə gözləyirlər.
Braziliyalını arxayın salıblar ki, ehtiyat skamyada vaxt keçirməyəcək, ilk vaxtlardan etibarən oynamaq şansı qazanacaq.
SPORTİNFO.AZ
